Энэ үеэр авто зам эвдэрсэн, зорчих хөдөлгөөн хаагдсан эсэх талаар Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн Г.Отгонтамираас тодруулахад "Борооны улмаас Төв аймгийн Лүн сумын нутаг дэвсгэр Булган аймгийн Рашаант сумын хоорондох замд бага хэмжээний үер бууж замын зорчих хэсэг дээгүүр үерийн ус урссан зам эвдэрсэн зүйлгүй, хөдөлгөөн хэвийн явж байна.

Одоо зорчих хэсэг дээр байгаа шавар болон бохирдсон зүйлийг цэвэрлүүлэх ажил явагдаж байна. Бороо тогтсон гэсэн мэдээллийг Төв аймгийн Лүн сумаас өгөөд байна" гэв.

Иргэд, зорчигчдод зөвлөхөд бороо орсон үед замын хагархай нүх харагддаггүй. Тиймээс тээврийн хэрэгслийн хурдаа тохируулж явах, техникийн бүрэн бүтэн байдлыг сайтар хангаж орон нутгийн замд гарч байхыг ТЦА-наас санууллаа.

Онцгой байдлын байгууллагад тус суманд үер буусан тухай дуудлага мэдээлэл бүртгэгдээгүйг хэлэв.

Өнөө шөнө Сэлэнгэ, Дархан-Уул аймгийн нутаг, Төв, Хэнтий аймгийн хойд хэсгээр их хэмжээний бороо цаг агаарын аюултай үзэгдлийн хэмжээнд хүрч орох тул болзошгүй үер ус, нөөлөг салхины аюулаас сэрэмжтэй байхыг Цаг уурын байгууллагаас анхаарууллаа.