Хятад улсын баруун хойд бүсийн Ниньшя мужийн төв Инчуань хотод ахуйн зориулалттай шингэрүүлсэн хий дэлбэрсний улмаас 31 хүн амь үрэгдэж, долоон хүн шархадсан осол гарчээ.

Лхагва гарагийн орой тус хотын нэг ресторанд уг осол гарсан байна. Хятад улсын дарга Ши Жиньпин шархадсан хүмүүсийг эмчлэхэд шаардлагатай бүх арга хэмжээг авах, ослын шалтгааныг мөрдөж тогтоох, гэм буруутай хүмүүст хариуцлага тооцохыг холбогдох албаныханд даалгажээ.

Алдагдсан хий үнэртэж байгаа тухай нэг ажилчин нь мэдээлснээс хойш цаг орчмын дараа рестораны тогооч хийн савны тагийг солих үеэр дэлбэрэлт болсныг Инчуань хотын захиргаа мэдээлсэн байна.

Хятадын онцгой байдлын сайд ажлын хэсгийг Ниньшя муж руу илгээж, орон нутгийн эрх баригчид ослын газарт мөрдөн шалгах ажлыг эхлүүлсэн тухай хэвлэлүүд мэдээлжээ.

2019 оны гуравдугаар сард Хятадын зүүн Жяньсү мужийн химийн үйлдвэрт дэлбэрэлт болоход 78 хүний амь үрэгдсэн нь үүнээс өмнө тохиолдсон хамгийн олон хохирогчтой осол юм.

Эх сурвалж: South China Morning Post