Сонгуулийн ерөнхий хорооны гишүүн, Улс төрийн намын мэдээлэл, арга зүйн газрын дарга Д.Баяндүүрэн Монголын Үндэсний Олон Нийтийн Радиогийн захирал Д.Бат-Орших, Монголын Үндэсний Олон Нийтийн Телевизийн Ерөнхий продессор Ч.Болормаа, Нийгмийн нэвтрүүлгийн продессор Д.Бямбацэцэг нартай өнөөдөр (2025.01.08) уулзаж, улс төрийн нам, эвсэлд төрөөс үзүүлэх шууд бус дэмжлэгийг хэрэгжүүлэх талаар ярилцлаа.

Улс төрийн намын тухай хууль (Шинэчилсэн найруулга)-ын 30 дугаар зүйлд нийт сонгогчийн нэг ба түүнээс дээш хувийн санал авсан нам сонгуулийн бус жилд төрөөс үзүүлэх шууд бус дэмжлэг авах эрхтэйг заасан. Шууд бус дэмжлэгийн нэг хэлбэр нь намын хөтөлбөр, үйл ажиллагааны талаарх нэвтрүүлгийг олон нийтийн радио, телевизээс гаргасан хуваарийн дагуу 30 минутаар улирал тутам үнэ төлбөргүй нэвтрүүлэх юм. Монгол Улсын Их хурлын 2024 оны ээлжит сонгуулиар нийт сонгогчийн нэг ба түүнээс дээш хувийн санал авсан есөн нам нэвтрүүлгээ нэвтрүүлэх хугацааны хүсэлтийг урьдчилсан байдлаар ирүүлснийг МҮОНРТ-д албан бичгээр хүргүүлсэн.

Уулзалтаар Улс төрийн намын тухай хуулийн талаар мэдээлэл өгч, намуудын хүсэлтийг хэрэгжүүлэх, сонгууль зохион байгуулах үйл явцын талаар олон нийтийг мэдээллээр хангах, сонгуулийн боловсрол олгох талаар ярилцлаа. Улмаар төрөөс үзүүлэх шууд бус дэмжлэгийн нэг хэлбэр нэвтрүүлгийг олон нийтэд түгээхэд МҮОНТ, МҮОНР-аас улс төрийн намуудтай хамтран ажиллахаар тохиролцов.