УИХ-ын гишүүн Ч.Лодойсамбуу Эрүүгийн хуулийн 13.14 гэх заалтыг бүхэлд нь хасуулах хуулийн төсөл санаачилж байгаа аж. Түүний энэхүү санаачилгад Ардчилсан намын 30 гишүүн нэгджээ. 

УИХ-ын гишүүн Ч.Лодойсамбуу:

-Хэвлэл мэдээллийн эрх чөлөөг хангах талаар санал дүгнэлт гаргах ажлын хэсгийг ахалж байгаа. Ажлын хэсэг хоёр удаа хуралдсан. Хэвлэл мэдээллийн эрх чөлөөг хангахад учирч буй хуулийн саадуудыг тодруулахаар судалгаа хийлгэсэн. Судалгааны дүнг хүлээж байна.

Хоёрдугаарт, Хэвлэл мэдээллийн эрх чөлөөний тухай хуулийг өнөөдөр бүлгийн хуралд танилцуулсан. Хоёр тусдаа зүйл. ХЗДХЯ-ны өгч буй мэдээллээр дөрвөн удаа санал авч энэхүү шинэчилсэн найруулгадаа тусгасан юм байна. Манай бүлгийн, тэр дундаа сэтгүүлч гишүүд энэ хуулийг бүхэлд нь дэмжихгүй байгаагаа хэлсэн.

Эрүүгийн хуулийн 13.14 дэх заалт дахь “Илт худал мэдээлэл” гэж юуг хэлж байгааг илүү нарийн тодорхой болгох заалт орж ирсэн. Би өөрийн бланк дээр энэ заалтыг бүхэлд нь байхгүй болгох хуулийн төсөл санаачилж, өргөн барих гэж байна. Одоо товоо хүлээж байгаа.

Эрүүгийн хуулийн 13.14 гэдэг заалт сэтгүүлчдэд огт хамаарах ёсгүй. Өнөөдөр ерөөсөө үзэл бодлоо илэрхийлсэн, таамаглаж бичсэн мэдээллийг бусадтай хуваалцсан хүмүүсийг энэ заалтаар эрүүгийн ялтан болгож байгаа. Иймд энэ заалтыг хүчингүй болгоё гэдэг бичигт бүлгийн хуралд суусан 31 гишүүний 90 гаруй хувь нь дэмжиж, гарын үсэг зурсан. Ардчилсан намын 31 гишүүн Эрүүгийн хуулийн 13.14 гэдэг заалтыг хасахыг дэмжиж, хамт өргөн барихаар болж байна.

Түүнчлэн, Жагсаал цуглаан хийх эрх чөлөөний тухай хууль шинэчилсэн найруулгаар орж ирж байна. Тайван жагсаал цуглаан хийхэд саад болдог, иргэн цагдааг мөргөлдүүлдэг асуудлыг зассан хууль орж ирсэн. Бүлгийн гишүүд дуу нэгтэйгээр тус хуулийг дэмжиж байгаа. Зөвшөөрөл төрөөс хүсэж жагсдаг байдал алга болно гэлээ.