Мягмар гарагт Украины тал Москва хот руу таван ширхэг нисгэгчгүй онгоцоор довтолсныг бүгдийг нь устгаснаа ОХУ-ын батлан хамгаалах яам мэдээлжээ.

Эдгээрийн дөрвийг нь агаарын довтолгооноос хамгаалах пуужингийн системээр, нэгийг нь зайнаас удирдлагагүй болгодог цахилгаан соронзон зэвсгээр унагасан гэж мэдээлсэн байна.

Дронууд унахдаа ямар нэг хохирол учруулаагүйг бас мэдээлжээ.

Хоёр дроныг Кремлийн ордноос баруун өмнө зүгт 30 км зайд, нэгийг хөрш Калуга мужийн нутаг дэвсгэрт унагасан тухай Оросын хэвлэлүүд уламжилсан байна.

Халдлагын үеэр Москва хотын Внуково олон улсын нисэх буудлыг түр хааж, ирэх явах нислэгүүдийг хэдэн цагийн турш зогсоожээ.

Уг тасалдал Турк, Арабын Нэгдсэн Эмират, Египетээс ирсэн онгоцнуудын чиглэл, хуваарьт нөлөөлсөн байна.

“Киевийн дэглэм иргэний зориулалттай дэд бүтцүүдэд, тэр дундаа олон улсын нислэг хүлээж авдаг буудалд халдахыг завдсан нь ээлжит нэг террорист ажиллагаа боллоо. НҮБ-ын аюулгүй байдлын зөвлөлийн байнгын гишүүн АНУ, Франц, Их Британи улсууд террорист дэглэмийг санхүүжүүлж буйг олон улсын хамтын нийгэмлэг ухаарах цаг болсон” гэж ОХУ-ын гадаад хэргийн яамны хэвлэлийн төлөөлөгч Мария Захарова өчигдөр Телеграм хуудсандаа бичжээ.

Украины эрх баригчид энэхүү халдлагын талаар ямар нэг байр суурь илэрхийлээгүй байна. Оросын нутаг дэвсгэрт гарсан ямар ч халдлагыг үйлдсэнээ Украины тал өмнө нь албан ёсоор хүлээж байгаагүй юм.

Дрон буюу нисгэгчгүй онгоцны халдлага сүүлийн саруудад ОХУ-ын нутаг дэвсгэрт улам бур эрчимжиж байгаа.

Тухайлбал энэ оны тавдугаар сард Кремлийн ордон дроны халдлагад өртөж байсан юм.

Эх сурвалж: Reuters