Зам, тээврийн сайд Б.Дэлгэрсайхан өнөөдөр /2024.11.13/ цаг үеийн асуудлаар сэтгүүлчдэд мэдээлэл өглөө. Тэрбээр "Засгийн газрын хуралдаан дээр Гашуунсухайт-Ганцмод хил дамнасан холболтын төмөр замын төслийн явцын талаар хэлэлцлээ. Одоо энэ талаар УИХ дахь намын бүлгүүдэд танилцуулж,  УИХ-аараа оруулна. Энэ бүтээн байгуулалтад тулгамдаж буй ямар нэгэн асуудал байхгүй. Хоёр тал ойлголцсон. Ганцхан биднээс л шалтгаална. Сэтгүүлч та бүхнээс шалтгаална. Та хэд буруу зөрүү мэдээлж, сэвээд байна. Олон нийтэд зөв мэдээлэл өгч, ойлгуулах хэрэгтэй байна.

Дэлхий нийтээрээ энэ холболтыг хийхгүй бол хөгжихгүй гэдгийг харууллаа шүү дээ. Бид 10 хэдэн жил маргалдаж, хэрэлдлээ.

Одоо хэвлэл мэдээлэл, УИХ-ын гишүүдтэй нийлэн нэг тал болж, Хятадын болзлуудаа татан авч, зөвшөөрсөн дээр нь замаа холбох бодолтой байна. Та нар дэмжээд өгөөч. Урд хөршөөс ямар ч болзол тавихаа больсон. Ер нь нөгөө талаас жилд 20-иос доошгүй сая тонн нүүрс худалдан авъя гэж байгаа. Бид аль болох удаан хугацаанд их хэмжээний нүүрсээ худалдах нь Монголд чухал ач холбогдолтой гэж үзэж байгаа" гэсэн юм.

Мөн тэрбээр "Ний нуугүй хэлэхэд намайг Түгжрэлийн сайд байхад л туннель, гүүрний асуудал яригдаж эхэлсэн. Нэгэнт би анхнаасаа энэ асуудлыг хариуцсан учраас ажлаа гүйцээгээд хий гэдэг чиглэлийг өгсөн. Би богино хугацаанд Түгжрэлийн сайдаар ажиллаж, хэр чадлаараа хэдэн саарал автобус оруулж ирсэн. Түгжрэл буураагүй. Ер нь зам дээр машин нь багтахаа байсан шүү дээ" гэлээ.