2025 оны төсвийн төслийг хэлэлцэж буйтай холбогдуулан Засгийн газарт шаардлага хүргүүлж байгаа талаар УИХ-ын гишүүн Н.Энхтүвшин, Г.Тэмүүлэн, Ж.Баярмаа, Б.Түвшин нар өнөөдөр /2024.11.04/ Төрийн ордонд мэдээлэл хийлээ.

УИХ-ын гишүүн Д.Энхтүвшин, “Сонгууль болоод дөрвөн сарын хугацаа өнгөрсөн байна. Дөрвөн сарын өмнөх сонгуулиар МАН Улсын төсвийн зарлагын ДНБ-д эзлэх хувийг 25% хүртэл бууруулж, Засгийн газрын өрийг 40 хувиас доош тогтмол байлгана гэсэн мөрийн хөтөлбөрийг дэвшүүлсэн. Харин АН төсвийн нийт зарлагыг 20 хувиар багасгана гэсэн бол ХҮН намын хувьд бизнест ээлтэй татварын орчинг бий болгож, татварын төсвийн зардлыг бодитоор буулгана гэсэн мөрийн хөтөлбөр дэвшүүлж байжээ. Гэтэл өнөөдрийн байдлаар Монгол Улсын нийт төсвийн ДНД-д эзлэх хувийг 37.7 хувь болгохоор тооцоолж орж ирсэн байна. Энэ нь дөрвөн сарын өмнө амалж байсан намуудын мөрийн хөтөлбөрөөс зөрж байгаа юм. Хэрвээ нэмэгдэж буй төсвийн дүн хувийн хэвшилд байсан бол олон хүмүүсийн ажлын байр, олон бизнест хөрөнгө оруулалт болох байсан” гэлээ.

УИХ-ын гишүүн Ж.Баярмаа, “Ирэх оны төсөвт томилолт, зочны зардал гэхэд л 111 тэрбум төгрөг болсон нь өмнөх оны мөн үеэс 4 дахин нэмэгдсэн дүн юм. Үүнээс гадна тавилга, эд хогшил, урсгал зардалд 267 тэрбум төгрөгийг тавьсан байгаа нь өнгөрсөн оны төсвөөс 2.2 дахин нэмэгдсэн байна. Мөн мэдээлэл технологийн үйлчилгээ гэх зардалд 70 тэрбум төгрөг тавьсан нь 3.6 дахин нэмэгдэж байна. Бас нэг ноцтой зүйл гэвэл бусдаар гүйцэлдүүлсэн ажил үйлчилгээний зардалд 1.9 их наяд буюу өмнөх оны үеэс 2.5 дахин нэмэгдсэн байна. Энд ямар ажил үйлчилгээ явах нь тодорхойгүй байгаа нь шударга бус гэж үзэж байна” гэлээ.

УИХ-ын гишүүн Б.Түвшин, “2024 онд Засгийн газрын урсгал зардал 22 их наяд байгаа нь маш их үргүй зардалтай гэх аудитын дүгнэлт гарсаар байхад дахиад 26 их наяд болгон өсгөж оруулж ирж байна. Иймд урсгал зардлаас үргүй хэсгийг нь хасах шаардлагыг хүргүүлж байгаа юм. Бизнес эрхлэгч, ажил олгогч нар нийгмийн даатгал болон нэмэгдсэн өртгийн албан татварын өндөр дарамтанд байхад тэдний төлж буй энэ их мөнгө үргүй байдлаар зарцуулагдаж байгаа тул тусгай шаардлагыг Засгийн газарт хүргүүлж байна" гэлээ.

УИХ-ын гишүүн Г.Тэмүүлэн, “Бидний гол санаа зовж буй зүйл бол зарлагын хэт өсөлт, төсөвийн тэлэлт юм. Үндсэндээ иргэдийн амьдрал, эдийн засагт сөргөөр нөлөөлж буй зүйл байгаа учир 2025 оны төсвийн төслийг дахин хэлэлцэх шаардлага зайлшгүй байна. Шаардлагатай засварыг оруулах шаардлагатай" гэлээ.