Улстөрчид болон төрийн өндөр дээд албан тушаалтнуудын уул уурхайг уудалдаг ганц хүн бол “Шилэн” Цогоо буюу Батчулууны Цогтгэрэл. Тэрээр өдгөө ч тэдний идсэн уусан, завшсан мөнгө төгрөгийг баримтаар ил болгосоор байна. Түүний энэхүү үйлдлийг иргэд олон нийт дэмжиж байгааг цахим хуудаснаас харж болно.

Саяхан гэхэд УИХ-ын гишүүн, Байгаль орчин, уур амьсгалын өөрчлөлтийн сайд С.Одонтуяагийн авсан тавилгуудын талаар дэлгэжээ. С.Одонтуяа сайд байгаль, цаг уур орчны тал дээр ажиллахаасаа илүүтэй өрөөгөө итали тавилгуудаар гоёсныг баримтаар дэлгэсэн байна. Үүнийг “И Эн Си Групп” ХХК-ийн албан ёсны “Facebook” хаягаас тавилгуудын мэдээллийг авч харж болно.

АН-аас сонгогдсон сайд нарын мөнгө завшсан асуудал үүгээр дуусахгүй, Барилга, хот байгуулалтын сайд Ж.Батсуурь тэргүүтэй дарга нар төсвийн 21.990.000 /Хорин нэгэн сая есөн зуун ерэн мянган/ төгрөгөөр эмнэлэгт биеэ үзүүлж, эрүүл мэндийн үйлчилгээ авсныг ч дэлгэжээ.

Үүнээс гадна Монгол Улсын сайд, Хяналт, үнэлгээний Үндэсний хорооны дарга Э.Одбаяр хэмээх С.Эрдэнийн “Сугны үс” хүмүүсийн хамт улсын төсвөөр Вьетнам улсын Пукок явсан тухай ч дэлгэсэн. Үүнийг бүр тодорхой дэлгэсэн бөгөөд Улаанбаатар хотоос өглөө 08:40 цагт нисээд Сөүлд 12:50 буусан аж. Эндээс 21:10 цагт нисээд Ханой хотод 23:40 буужээ. Ийнхүү Ханойд нэг хоноод хоёр дахь өдрийнхөө өглөө 06:30 цагаас Пукок ниссэн байна.

Тэдний хувьд аялал жуулчлалын диваажин Пукокт зургаан хоног төрийн албаны туршлагаа судлах нэрээр тансаглаж, зургаа дахь өдрийнхөө үдэш 23:00 цагт Сөүл нисэж, Сөүлээс 14:20 цагт Улаанбаатар хотын зүг ниссэнийг баримтаар дэлгэжээ. Энэ багт явсан хүний тоо 20 байсан бөгөөд зөвхөн онгоцны тийзний зардал нь 55,126,000 төгрөг болсон ажээ. Тэгэхээр буусан буудал, хоол унд, дэлгүүр хоршооноос худалдан авалт гээд асар өндөр зардал гарсан байж таарна. Төр, төсвийн мөнгийг ингэж л үрж байгааг “Шилэн” Цогоо баримтаар дэлгэсэн байна.

Төсвийн мөнгө уйлдаггүй гэдэг дээ. Түмний итгэлийг авч төрд гарч ирсэн сайд нар ийнхүү татвар төлөгчдийн мөнгөөр тансаглаад байхаар яах билээ. Үүнд Засгийн газар, холбогдох байгууллагууд анхаарлаа хандуулаач ээ гэдгийг хаа хаанаа сануулж байна.