2024 оны УИХ-ын сонгуульд ИЗНН дөрвөн суудал авсан бол орон нутгийн сонгуульд өрсөлдсөн ч нэг ч суудал авч чадаагүй юм.

Иргэний зориг ногоон нам /ИЗНН/-ын дарга Б.Батбаатар: “ИЗНН-ын Улс төрийн зөвлөл өчигдөр хуралдаж, сүүдрийн Засгийн газар байгуулж ажиллахаар шийдвэр гаргасан. Ойрын хугацаанд бид сүүдрийн Засгийн газрын ажиллах дүрэм журам, бүтэц бүрэлдэхүүн хэрхэн яаж ажиллах тухай арга хэлбэрийг тодорхойлно.

Монгол Улсад өнөөдөр үүсээд байгаа УИХ нь Засгийн газрын түвшинд очсон. УИХ нь ард түмний парламент байх ёстой. УИХ дахь олонхи нь өөрөө 118 гэдэг бүдүүн бүлэгтэй байж болохгүй. Бид хяналт тавьж, иргэдэд ус агаар мэт хэрэгтэй байгаа улс төрийн сөрөг хүчний үүргийг хэрэгжүүлж ажиллах болно” гэлээ.

Орон нутгийн сонгуульд амжилтгүй оролцсон шалтгаанаа тус намын дарга Б.Батбаатар “Улаанбаатар хотын 100 сонгогч тутмын 40 нь ирж саналаа өгсөн. 40 сонгогчийн 20 хүрэхгүй сонгогчийн саналаар Нийслэлийн Иргэдийн төлөөлөгчдийн хурлын 90 хувийг МАН засаглахаар боллоо. Энэ бол орон нутгийн сонгуулийн хуульд өөрчлөлт оруулах зайлшгүй шаардлагатайг харууллаа” гэлээ.