Хотын дарга Х.Нямбаатар өнөөдөр /2024.10.11/ Нийслэлийн иргэдийн төлөөлөгчдийн хурлын 2024 оны ээлжит сонгуульд саналаа өглөө.

Тэрбээр, Сонгинохайрхан дүүргийн 19 дүгээр хороо 62 дугаар сургуульд байрлаж байгаа хэсгийн хороонд ирж саналаа өглөө. 1992 оны шинэ Үндсэн хууль батлагдсанаас бид аймаг, нийслэл, сум, дүүргийн ИТХ-ын ес дэх удаагийн сонгуульд оролцож байна. Аймаг, нийслэл, сум, дүүргийн иргэдийн төлөөлөгчдийг сонгох энэ сонгуулийн үндсэн зорилго бол нутгийн өөрөө удирдах байгууллагаа иргэд хамтаараа сонгон бүрдүүлэх, нутгийн өөрөө удирдах байгууллагаас тухайн засаг захиргаа, нутаг дэвсгэрийн нэгжид төрийн удирдлагыг хэрэгжүүлэх шат шатны Засаг даргыг дэвшүүлж, дээд шатны Засаг дарга, Ерөнхий сайдаар батламжилдаг. Тэгэхээр энэ удаагийн сонгуульд нам эвслийн бүлгүүд, нам эвслүүд тухайн орон нутгийг, тойргийг хөгжүүлэх хөтөлбөрөө мөрийн хөтөлбөр болгон танилцуулж, тэрхүү мөрийн хөтөлбөрт нь иргэд сонгогчид үнэлэлт дүгнэлт өгсний үндсэн дээр нутгийн өөрөө удирдах байгууллага бүрддэг.

Нутгийн өөрөө удирдах байгууллага олонх болсон нам эвслээс тухайн шатны иргэдийн хурлын дарга цаашлаад тухайн шатны Засаг даргыг дэвшүүлж дээд шатны Засаг дарга эсвэл Ерөнхий сайд батламжилдаг тогтолцоо бүрдээд үндсэндээ ес дэх удаагаа сонгууль болж байна.

Энэ удаагийн сонгуульд иргэд, сонгогчид илүү идэвхтэй хамрагдаасай гэж уриалж байна. Учир нь та бидний болон бидний үр хүүхдийн эрүүл, аюулгүй, хүртээмжтэй хотыг байгуулахад нэр дэвшигчдийн мөрийн хөтөлбөрт иргэд өөрсдөө мэргэн сонголт хийж, тухайн шатны ИТХ-ын төлөөлөгчдийг даруй бүрдүүлэхэд тустай.