УИХ-ын чуулганы хуралдаанаар Монгол Улсын нэгдсэн төсвийн 2025 оны төсвийн хүрээний мэдэгдэл, 2026-2027 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэж байна. 

Энэ үеэр УИХ-ын гишүүн Ц.Мөнхтуяа Боловсролын сайдаас багш нарын цалин, хангамжтай холбоотой дараах зүйлийг тодруулав.

Тэрбээр “2025 оны улсын төсөвт нийт төрийн албан хаагчдын цалинг 6 хувиар нэмэх асуудлыг тусгасан. Үүнтэй холбоотойгоор багш нарын цалин 84-хэн мянган төгрөгөөр нэмэгдэнэ. Та багш нарын цалинг нэмэхийг Гэр бүл, хөдөлмөр, нийгмийн хамгааллын яамнаас байнга шаардаж байгаа гэсэн. Та салбарын сайдын хувиар багш нарын цалинг хэдэн хувиар нэмэх санал гаргасан бэ. Танд нэмэх хүсэл байгаад бусад яамд саад болоод байгаа бол энд хэлмээр байна.

Гүйцэтгэлийн үнэлгээний урамшууллыг үндсэн цалинд шилжүүлэхэд багшийн цалин 1.8 сая төгрөгт хүрэх боломжтой гэдэг тооцооллыг хийсэн. Энэ талаар та надтай ярилцмаар байна. Таарахаараа зугтаад байх юм.

Та 3.8 сая төгрөгийн цалинтай 1,000 багш байгаа гэж ярьсан. Энэ нь 1.4 сая төгрөгийн цалинтай багш 180 хувийн нэмэгдэл авч байж энэ хэмжээнд хүрэх тооцоолол. Ийм боломжгүй гэдгийг багш нар танд хэлээд байгаа. Гэтэл та хүний үг авдаггүй, сонин юм. Үнэхээр гайхаж байна.

Энэ хичээлийн жил эхлэхэд 4,200 гаруй багш дутагдалтай байна гэж байсан. Энэ тоо хэдээр нөхөгдсөн бэ.

Жилд ганц тохиодог, мэргэжлээрээ бахархдаг энэ өдөр та багш нараа баярлуулах ямар сайхан мэдээ дуулгах гэж байна вэ” гэв.

Боловсролын сайд П.Наранбаяр “Та бид хоёр нэг танхимд сууж байна. Би танаас зугтааж байгаагүй. Яагаад ингэж ойлгосон юм бол доо.

Нийт багш нартаа багш нарын баярын мэндийг хүргэж байна. Би өчигдөр үйлдвэрчний эвлэлийнхэнтэй уулзаж, тулгамдаад байгаа асуудлаа ярьсан.

Багшийн дутагдлын тухайд, МУИС-д физикийн чиглэлээр:

• 2024 онд 8,
• 2022-2023 онд 2,
• 2021-2022 онд 7 мэргэжилтэн бэлдсэн байна.

Харин МУБИС физикийн багшаар жил бүр 30-40 хүн төгсгөж байна. Энэ жилийн наймдугаар сард физикийн 190 багш дутагдалтай байсан. Есдүгээр сарын байдлаар 11-хэн багш ажилд орсон.

Үйлдвэрчний эвлэл, яамны хооронд байгуулсан гэрээнд 2026 онд хүртэл салбарын ажилтнуудынхаа цалинг 30-аас доошгүй хувиар өсгөнө гэдэг асуудлыг тусгасан байгаа. Бид энэ үүргээ биелүүлэхээс ажиллаж байгаа.

Ирэх оны төсөвт төрийн албан хаагчдын цалинг 6 хувиар өсгөнө гэдгийг инфляцтай уялдуулж тооцсон. Эрүүл мэнд, боловсролын салбарынхны цалинг нэмэх шаардлагатай байгааг хүн болгон ойлгож байгаа.

Миний хэлсэн багшийн цалин бол баталгаатай тоо. Өнөөдөр суманд очоод ажиллахад 40 хувийн нэмэгдэл авч байгаа. Үүнээс гадна зэргийн нэмэгдэл, 30 хувь, гүйцэтгэлийн үнэлгээ нэмэгдэнэ. Та гүйцэтгэлийн үнэлгээг үндсэн цалинд шингээнэ гэж ярьж байна. Гэтэл гүйцэтгэлийн үнэлгээнд суурилсан цалингийн систем рүү орчихсон байгаа. Харин гүйцэтгэлийн үнэлгээгээр урамшуулал авдаг багшийн тоо эрс нэмэгдсэнийг та ойлгож хандах ёстой шүү” гэдэг хариулт өглөө.