Монгол Улсын Шинжлэх Ухааны Академийн дээд шагнал болох “Хубилай хаан” одон медалийг Шинжлэх ухааны хөгжилд бодитой хувь нэмэр оруулж, Монгол Улсын шинжлэх ухаан, технологи, инновацын хөгжилд онцгой хувь нэмэр оруулсан иргэнд олгодог билээ.

Энэ жилийн "Хубилай хаан" медалийг өчигдөр /2024.09.24/ гардууллаа. Тодруулбал, Биохимийн салбарын тэргүүлэх эрдэмтэн, Монгол чацарганын тосыг сансрын нисгэгчдийн хоол хүнсэнд хэрэглэх, сансрын нислэгийн үед цусанд үүсэх чөлөөт радикалын хэмжээг бууруулдаг болохыг тогтоосон, төрөөс үндэсний шинжлэх ухааны салбарын хөгжилд анхаарах чиг хандлагыг сайжруулахад онцгой хувь нэмэр оруулсан Монгол Улсын Их Хурлын гишүүн, Академич Дүгэрийн Рэгдэлийг “Хубилай хаан” медалийн эзнээр тодрууллаа.

Мөн Монгол Улсын шинжлэх ухаан, технологийн салбарын эрх зүйн орчныг сайжруулж, дэлхийн жишиг, дотоодын онцлогт нийцүүлэн, эрдэм шинжилгээний байгууллагуудын үндсэн чиглэлийн санхүүжилтийг бий болгож, салбарын дэд бүтцийг бий болгож цахим, нээлттэй шинжлэх ухааныг хөгжүүлэхэд үнэтэй хувь нэмэр оруулсан тул  Монгол Улсын Их Хурлын гишүүн, Гэр бүл, хөдөлмөр, нийгмийн хамгааллын сайд Лувсанцэрэнгийн Энх-Амгаланг тус медалиар шагнажээ.

Түүнчлэн Шинжлэх ухааны 150 гаруй өгүүллийг мал эмнэлэг, хүнсний аюулгүй байдал, нийтийн эрүүл мэндийн чиглэлээр хийсэн судалгааны үр дүнд тулгуурлан бичсэн Мал эмнэлгийн хүрээлэнгийн захирал, доктор Бадгарын Батцэцэг, Япон Улсын Каназавагийн их сургуулийн профессор Кацүжи Ёши-ока, ОХУ-ын Шинжлэх Улааны Академийн зөвлөх, академич Валентин Иванович Сергиенко нарыг тус тус шагнасан байна.