Монголын жүдо бөхийн холбоо 2022-2024 он буюу Токио-Парис хүртэлх зуны олимпын мөчлөгийн тайлангийн хурлаа өчигдөр /2024.09.01/ зохион байгуулжээ. Уг хуралд Холбооны ерөнхийлөгч Х.Баттулга, Хөдөлмөрийн баатар, МУГД, зөвлөх дасгалжуулагч Ч.Насантогтох, Дэд Ерөнхийлөгч Д.Цогтбаатар, Ерөнхий нарийн бичгийн дарга Б.Батгэрэл, Жүдо бөхийн холбооны ажилчид, Үндэсний шигшээ багийн ахлах дасгалжуулагч Х.Болдбаатар тэргүүтэй дасгалжуулагчид болон Үндэсний шигшээ багийн тамирчид оролцсон байна.

Мөн 2022-2024 онд ДАШТ-д оролцсон дасгалжуулагч, тамирчид тус бүрийн дүгнэлт тайлан, 2024 оны зуны олимпын наадамд оролцсон багийн дасгалжуулагчид, тамирчдын дүгнэлтийн талаар дэлгэрэнгүй ярилцсан байна. Тус хурлын үеэр Токио-2020, Парис-2024 хоёр зуны олимп дараалан “Үндэсний шигшээ баг”-г ахлан ажилласан МУГД, МУГТ Х.Болдбаатар амласан зорилт болох олимпын аваргыг дахин төрүүлэх, олимпын наадмын алтан медаль Монгол улсдаа авчрах зорилго, ажлын үр дүнгээ хангалтгүй хэмээн үзэж албан ёсоор ахлах дасгалжуулагчийн ажлаас чөлөөлөгдөх хүсэлтээ холбооны ерөнхийлөгчид хүргүүлжээ. Мөн 2024-2028 онуудад өсвөр, залуучуудын ангилалд олон улсын тэмцээнийг зохион байгуулах, залгамж тамирчдад анхаарахаа цохон тэмдэглэв. Албан ёсоор Лос Анжелесын олимпын цикл өнөөдрөөс эхэлж буйг илэрхийллээ.