Монгол Улсын Ерөнхийлөгч У.Хүрэлсүхийн ивээл дор НҮБ-тай хамтран Дэлхийн эмэгтэйчүүдийн чуулга уулзалтыг Улаанбаатар хотноо энэ сарын 22, 23-нд "Ногоон ирээдүйн төлөө" сэдвийн хүрээнд зохион байгуулахаар болсон талаар Ерөнхийлөгчийн Гадаад бодлогын зөвлөх Э.Одбаяр, Гадаад харилцааны яамны Төрийн нарийн бичгийн даргын албан үүргийг түр орлон гүйцэтгэгч Л.Мөнхтүшиг, НҮБ-ын Суурин зохицуулагч Тапан Мишра нар өнөөдөр /2024.08.16/ мэдээлэл өглөө.

Уг чуулга уулзалт энэ сарын 22-23-ны өдрүүдэд болох бөгөөд 15 улсын төрийн тэргүүн, хууль тогтоох байгууллагын дарга, сайд нар болон 20 орчим улсын төрийн бус байгууллага, бизнес, спорт, урлагийн нөлөө бүхий манлайлагчид оролцох аж.

Одоогийн байдлаар Словени улсын Ерөнхийлөгч, Лаос улсын дэд ерөнхийлөгч, Киргиз улсын тэргүүн хатагтай, Болгар улсын парламентын орлогч дарга зэрэг өндөр дээд түвшний зочид ирэх бол хамтран зохион байгуулагч НҮБ-ыг төлөөлж ерөнхий нарийн бичгийн даргын орлогч тэргүүтэй НҮБ-ын удирдлагууд оролцохоор болсон байна.

Дашрамд сонирхуулахад, чуулганы хүрээнд тусгайлан НҮБ-ын тогтвортой хөгжлийн 17 зорилтыг хэрэгжүүлэхэд гар бие оролцож байгаа эмэгтэйчүүдийн үйл хэргийг харуулсан "Манлайллын 17 төрх" хэмээх гэрэл зургийн үзэсгэлэн гаргахаар төлөвлөжээ.