-“Эко констракшн” компани өнгөрсөн жил хотын төв буюу “Монгол шуудан” компанийн замын эсрэг талд 25 давхар “Eco International Tower” барилгыг ашиглалтад оруулсан. Тэгвэл тус барилгатай залгаа 50 давхар барилга барихаар ажлаа эхлүүлээд багагүй хугацаа өнгөрч буй. Автозамын түгжрэл нийслэлчүүдийн “толгойны өвчин” болсон энэ үед, хотын төвд 50 давхар барилга барих нь хэр оновчтой вэ гэдэг асуудал хөндөгдөх нь зүйн хэрэг юм. Иймд энэ асуудлаар Нийслэлийн Засаг дарга Х.Нямбаатараас тодрууллаа

Нийслэлийн Засаг дарга Х.Нямбаатар:

-Бид барилга эхлүүлэх зөвшөөрөл өгөхгүй гэдэг хариу өгсөн. Шүүхэд хандсан. Шүүхээс даалгасан шийдвэр гарсан. Шүүхийн шийдвэрийн дагуу Хот байгуулалтын газраас шийдвэр гүйцэтгэлийг хэрэгжүүлээд явж байгаа.

Бидэнд анх танилцуулсан мэдээллээр зочид буудал барина гэсэн. Бидний зүгээс тус компанийг “Түгжрэлийг бууруулах төсөөллөө танилцуул” гэсэн ч танилцуулаагүй. Тиймээс зөвшөөрөл өгөхгүй гэдэг хариу өгсөн. Гэтэл тус компани Захиргааны хэргийн шүүхэд хандсан. Захиргааны хэргийн шүүхээс Хот байгуулалт, хотын стандартын газрыг зөвшөөрөл олгох ёстой гэсэн даалгасан шийдвэр гарсан гэсэн мэдээлэл байна.

Газрын зөвшөөрлийг нэлээн дээр үед олгосон юм байна лээ. Яг хэдийд, хэн олгосныг хэлж мэдэхгүй байна. Хот байгуулалтын газрынхнаар дэлгэрэнгүй мэдээлэл өгүүлье. Бид архивыг нь үзэж байсан санагдаж байна гэв.