Монгол Улс, Европын Холбоо хооронд байгуулсан Ойн түншлэлийн санамж бичгийг хэрэгжүүлэх хүрээнд Европын Холбооны санхүүжилтээр хэрэгжих “Монгол орны хөдөө аж ахуйн менежмент, экосистемийн тогтвортой байдлыг хангах” төслийн II шатыг эхлүүлэх баримт бичигт БОУАӨ-ийн сайд С.Одонтуяа, Германы Олон улсын хамтын ажиллагааны байгууллагын Монгол дахь хөтөлбөрийн суурин төлөөлөгч Юүрген Хардвиг, НҮБ-ын Хүнс, хөдөө аж ахуйн байгууллагын Монгол дахь Суурин зохицуулагч Винод Ахужа нар энэ сарын 14-нд гарын үсэг зурлаа.

Энэ оны наймдугаар сараас 48 сар буюу 4 жилийн хугацаанд 15,8 сая еврогийн санхүүжилтээр Хэнтий, Сэлэнгэ, Хөвсгөл, Завхан аймагт хэрэгжих уг төслийн хүрээнд дараах зорилтод нийцсэн арга хэмжээг гүйцэтгэх аж.

Үүнд,

• Ойн болон хөдөө аж ахуйн бүс нутагт тогтвортой менежментийг хэрэгжүүлэх, мэргэжлийн боловсролын салбарын хөгжлийг дэмжсэн бодлого зохицуулалтын эрх зүйн тогтолцоог боловсронгуй болгох 
• Хөдөө аж ахуйн болон ойн салбарт чиглэсэн ландшафтын түвшний газрын нэгдсэн менежментийг хэрэгжүүлэх
• ХАА-н болон ойн бүтээгдэхүүний нэмүү өртгийн сүлжээг хөгжүүлэх, бэхжүүлэх 
• ХАА, ойн аж ахуйн салбарын хөдөлмөрийн зах зээлийн эрэлт хэрэгцээг хангах, МСҮТ-ийн чадавхыг нэмэгдүүлэх зэрэг ажлыг хийх юм.

Байгаль орчин, уур амьсгалын өөрчлөлтийн сайд С.Одонтуяа олон талын үр өгөөж бүхий энэхүү төслийг яамны зүгээс бодлого, стратегийн түвшинд онцгойлон анхаарахаа илэрхийллээ.