УИХ-ын түр хорооноос ашигт малтмалын тусгай зөвшөөрлийн асуудлыг хянан шалгах нээлттэй сонсголын тов болон гэрчүүдийн талаар Төрийн ордонд өнөөдөр мэдээлэл өглөө. 

Хянан шалгах түр хорооны нээлттэй сонсгол тавдугаар сарын 29, 30-нд болох аж. УИХ-ын гишүүн Б.Энх-Амгалан сонсголыг даргалах бөгөөд дөрвөн асуудал найман сэдвийн хүрээнд зохион байгуулагдах юм. 

ТАВДУГААР САРЫН 29-НД ХЭЛЭЛЦЭХ АСУУДЛУУД: 

1. "Ашигт малтмал хайх, ашиглах зориулалтаар газар түүний хэвлийг тусгай зөвшөөрлөөр олгох, бүртгэх үйл ажиллагаа" сэдвийн хүрээнд дараах асуудлыг хэлэлцэнэ. Үүнд:

• Ашиг малтмалын хайгуул, ашиглалтын тусгай зөвшөөрлийг зохих хууль журмыг олгож, бүртгэж, баталгаажуулсан эсэх, тусгай зөвшөөрөл олгох сонгон шалгаруулалтын журам зөрчигдсөн эсэх. 
• Ашиг малтмалын хайгуул, ашиглалтын тусгай зөвшөөрөлтэй холбоотой зөрчил байгаа эсэх. Тоо эзэмшигч, нөөц, давхцал, шилжилт хөдөлгөөн, харилцан хамаарал бүхий этгээдүүд

2. "Тусгай зөвшөөрлөөр олгосон газар түүний хэвлийг зориулалтын дагуу ашиглаж байгаа эсэх" сэдвийн хүрээнд дараах асуудлыг хэлэлцэнэ. Үүнд: 

• Тусгай зөвшөөрлөөр олгогдсон тусгай зөвшөөрлийн талбай тогтвортой үйл ажиллагаа явуулж байгаа эсэх. 
• Нөөцгүй болон нөөц нь тодорхойгүй тусгай зөвшөөрлүүд, олборлолт явуулахгүй байгаа боловч бүтээгдэхүүн экспортлогдож буй тусгай зөвшөөрөл эзэмшигчдийн мэдээлэл. 

ТАВДУГААР САРЫН 29-НД ХЭЛЭЛЦЭХ АСУУДЛУУД: 

3. "Түгээмэл тархацтай ашигт малтмалын тухай хуулийн хэрэгжилт" сэдвийн хүрээнд дараах асуудлыг хэлэлцэнэ. Үүнд: 

• Түгээмэл тархацтай ашигт малтмалын хайгуул, тусгай зөвшөөрлийг хууль журмын дагуу олгож, хяналтыг хэрэгжүүлсэн эсэх.
• Бичил уурхайгаар ашигт малтмал олборлох журмын хэрэгжилт, борлуулалт, татвар ногдуулалт, төлөлт хяналт.

4. "Ашигт малтмалын нөөц ашигласны төлбөрийн ногдуулах, тайлагнах, төлөх, хянах, хураах үйл ажиллагаа" сэдвийн хүрээнд дараах асуудлыг хэлэлцэнэ. Үүнд:

• Ашигт малтмалын нөөц ашигласны төлбөр ногдуулах, тайлагнах, хураах үйл ажиллагаа, АМНАТ ногдуулалт, өр төлбөр. Өр төлбөртэй аж ахуйн нэгжүүдийн экспортын асуудал. Тусгай зөвшөөрөлгүй экспортлогч этгээдийн АМНАТ, жишиг үнэ. 
• Ашигт малтмалын нөөц ашигласны төлбөртэй холбоотой бусад асуудал. Төрийн өмчит үйлдвэрийн газрын балансын бус нөөц. Бага агуулгатай хүдрийн борлуулалт, дагалдах ашигт малтмалын АМНАТ, тусгай зөвшөөрөлгүй экспортлогчдын асуудал. 

"ХУУЧИН БОЛОН ОДОО АЖИЛЛАЖ БУЙ НИЙТ ДОЛООН САЙД, 10 АЙМГИЙН ЗАСАГ ДАРГЫГ ГЭРЧЭЭР ДУУДНА"

Гэрэл зургийг MPA агентлагийн онцгой зөвшөөрөлтэйгөөр ашиглав

Тус нээлттэй сонсголд оролцох гэрчийн мэдээллийн талаар УИХ-ын гишүүн П.Цэрэнпунцаг "Гэрчийн нэрсийг танилцуулахгүй. Нийт 105 хүнийг гэрчээр дуудна. Ажиглагчаар зургаан байгууллага, хуулийн байгууллагын төлөөлөл оролцоно. 

Гэрчийн нэрсийг гаргасан учраас хуулийн дагуу холбогдож сонсголд дуудна. Зарим нь Монголд байдаггүй гадаадын иргэд байна. Гадаадын иргэн эзэмшдэг компани байвал Монголд байгаа төлөөллийг дуудах учраас нэрсийн зөрүү гарна.

Хуучин болон одоо ажиллаж буй нийт долоон сайд, төрийн нарийн бичгийн дарга нэг, агентлагийн дарга байсан хоёр, албан тушаалтнууд 28, алба хашиж байсан хоёр, одоогийн аймгийн засаг дарга 10, сумын засаг дарга зургаа, аж ахуйн нэгж 47, төрийн бус байгууллага дөрөв гэсэн нийт 105 гэрчийг дуудаж байна.

Гэрчийн жагсаалт дотор миний нэр байгаа. Би гэрчээр дуудагдаж мэдээлэл өгнө.

Богино хугацаанд хянан шалгах түр хороо ажилласан. Хуваарилсан төсөв бага учраас уурхай бүрд ажиллах боломжгүй, хүний нөөц байхгүй.

Хамгийн боломжтой богино хугацаанд бэлэн байгаа нотлох баримт дээр тулгуурласан. 2014 оноос хойших цахимаар хадгалагдаж буй баримтыг ашигласан" хэмээн ярилаа.