АНУ-ын иргэний хуурамч нэр ашиглан томоохон компаниудад зайнаас ажиллах луйврын сүлжээ ажиллуулж байсан Умард Солонгосын мэдээллийн технологийн гурван мэргэжилтэн болон тэдний менежэрийн талаар мэдээлэл өгсөн хүнийг $5 саяар шагнахаа Вашингтоны эрх баригчид өчигдөр зарлажээ.

Тэдгээр мэргэжилтнүүд Хан Жихо, Жүн Чуньжи, Шү Хаоран гэсэн нэрээр, менежэр нь Зонхуа нэрээр ажиллаж байсан гэнэ.

Тэд 2020 оны аравдугаар сараас 2023 оны аравдугаар сар хүртэл хугацаанд АНУ-ын 60 гаруй иргэний нэрийг ашиглан төрөл бүрийн салбарын компаниудад зайнаас программ хөгжүүлэгчийн ажилд орох замаар Пёняны дэглэмд хамгийн багадаа $6.8 саяын орлого оруулсан гэж үзэж байгаа ажээ.

Тэдэнд хуурамч нэр, бичиг баримт олж өгөх, ажилд зуучлах, цалин хөлсийг нь дамжуулах ажлыг АНУ-ын иргэн Кристина Чэпмэн гэгч гүйцэтгэж байсан байна.

Шагналын мөнгийг АНУ-ын төрийн департаментын Дипломат Аюулгүй байдлын Газрын дэргэдэх RFJ (Reward For Justice) хөтөлбөр гаргахаар болжээ.

RFJ хөтөлбөр 1984 онд эхэлсэн цагаасаа хойш терроризмыг таслан зогсоох, АНУ-ын үндэсний аюулгүй байдалд заналхийлсэн үйлдлээс сэргийлэхэд шаардлагатай мэдээлэл өгсөн дэлхийн олон орны 125 хувь хүнд нийт $250 саяын шагнал өгч байсан юм байна.

Өчигдөр зарласан $5 саяын шагналыг Умард Солонгосын луйврын сүлжээг илрүүлэхэд шаардлагатай мэдээлэл өгсөн хүн тус бүрд өгөх ажээ.

Эх сурвалж: Yonhap News