Нийслэлийн удирдах ажилтнуудын шуурхай зөвлөгөөн өнөөдөр боллоо. Энэ үеэр хотын дарга Х.Нямбаатар "Эрэл" компанийн эзэмшил газрыг өнөөдрийн дотор хүчээр чөлөөлөх үүрэг өгөв. Тодруулбал, ХУД-ийн III хороо, Говийн замыг “Мишээл экспо”-той холбох зам тавих ажилд “Эрэл” компани 800 метр газар чөлөөлөхгүй жил гаруй болж байгаа аж. Шүүхийн шийдвэр гарсан ч багахан хэмжээний газрыг чөлөөлөхгүй байгаа нь зам тавих ажлыг бүхэлд нь саатуулаад байгааг онцолсон. 

Энэ талаар хотын дарга Х.Нямбаатар "Үлдсэн хэсэг газрыг өнөөдөр чөлөөлж, энэ ажлыг эхлүүлнэ. “Эрэл”-ийн Б.Эрдэнэбат Монголын ард түмний бүх боломжийг насан туршдаа идэж, хэрэглэж, газрын баялгийг хүртэл ховх сорсон. Эцэс сүүлд нь гадаадын казинод аваачиж тушаасан. Стадион тойрсон газар, Зүүн дөрвөн замыг тойрсон газар бүгд Б.Эрдэнэбатынх. Хотын үнэтэй, өөдтэй бүх газрууд “Эрэл”-ийн Б.Эрдэнэбат гэдэг хүний мэдэлд очсон. Өвөрхангай аймгийн Уянга сумын бүх газрыг Эрдэнэбат сүйтгэсэн “Эрэл”-ийн Б.Эрдэнэбат СОТ 2-ыг бас л авсан.

Тэр хүн Монголын хамаг л шим шүлтийг хүртчихээд, шүүхийн шийдвэр гарсан байхад 800 метр газар чөлөөлдөггүй юм. Нийслэлийн замын хөгжлийн газар, Газар зохион байгуулалтын албаныхан өнөөдөр техниктэй очиж, газрыг нь чөлөөлөөд ажлаа эхлүүлнэ. Нийтийн эрх ашиг нэгдүгээр байх ёстой" гэв.