Монгол Улс, БНХАУ-ын тал Замын-Үүд болон Эрээний Эдийн засгийн хамтын ажиллагааны чөлөөт бүсийг байгуулах асуудлыг шуурхайлах талаар санал солилцож дараах асуудлыг хэлэлцэн тохиролцов.

Үүнд:

• Бүсүүдийн хөгжлийн ерөнхий төлөвлөгөөг уялдуулж, яаралтай эцэслэн батлах, 
• Чөлөөт бүсүүдийг холбох хил холболтын цэгийг ойрын хугацаанд тогтоох,
• Чөлөөт бүсүүдэд хөрөнгө оруулалт татах арга хэмжээг хамтран зохион байгуулахаар тохиролцлоо.

Дээрх асуудлыг БНХАУ-ын ӨМӨЗО-ны Эрээнд хотод өчигдөр болсон Замын-Үүд, Эрээний Эдийн засгийн чөлөөт бүс байгуулах хамтарсан ажлын хэсгийн хурлаар хэлэлцэн тохиролцсон юм. Ажлын хэсгийн хурлыг Монгол Улсын талаас ЭЗХЯ, БНХАУ-ын талаас ӨМӨЗО-ны Худалдааны газар ахлан холбогдох төрийн байгууллагуудын төлөөллийг оролцуулан зохион байгуулжээ. Эдийн засгийн хамтын ажиллагааны чөлөөт бүс байгуулах нь 2 улсын эдийн засагт чухал ач холбогдолтой бөгөөд бүс нутгийн худалдаа, тээвэр логистик болон аялал жуулчлалд чухал нөлөө үзүүлнэ гэж ЭЗХЯ-наас мэдээллээ.