Ерөнхий сайдаас Эрчим хүчний сайд Б.Чойжилсүрэн-д өгсөн 30 хоногийн хугацаа ийнхүү дуусч байна. Энэ хугацаанд Дулааны IV цахилгаан станц-д үүссэн доголдол, салбарын удирдлага, бодлогын цэгцрэлийн талаар тодорхой шийдэл танилцуулах үүргийг хүлээсэн ч сайд Б.Чойжилсүрэн уг ажлынхаа тайланг энэ долоо хоногт Засгийн газрын хуралдаанд оруулах юм.

2025 оны дүнгээр төрийн өмчит 40 орчим компани нийт 150 тэрбум төгрөгийн алдагдалтай ажилласан бөгөөд тэдний дийлэнх нь эрчим хүчний салбарынх байна. Манай улсад эрчим хүчний чиглэлээр үйл ажиллагаа явуулж буй 34 компанийн ихэнх нь Эрчим хүчний яам-ны харьяанд, өөрөөр хэлбэл салбарын сайдын шууд мэдэлд багтдаг ч бүгд алдагдалтай ажилласан нь анхаарал татаж байна.

Энэ нөхцөл байдлыг Төрийн өмчийн бодлого, зохицуулалтын газар-ын дарга Б.Цэнгэл “Эрчим хүчний тарифыг төрөөс хүчээр барьж ирсэнтэй шууд холбоотой. Ийм нөхцөлд салбар алдагдалтай ажиллахаас өөр аргагүй. Үүссэн алдагдлыг улсын төсвөөс нөхөж ирсэн” хэмээн тайлбарласан юм.

Гэвч алдагдал гэдэг ойлголт эрчим хүчний салбарт энгийн үзэгдэл мэт хэвшиж, үнэ нэмэхгүй л бол ашигтай ажиллах боломжгүй гэсэн тайлбар бараг л хэвийн зүйл болжээ. Үүнийг олон нийт ч анзаарч, удаа дараагийн ийм мэдэгдэлд дөжирч, эрчим хүчний үнэ нэмэгдэх нь зайлшгүй гэх хүлээлтийг дотроо зөвшөөрсөн байдалтай байна. Одоо үлдсэн асуулт нь “үнэ хэзээ, ямар хэмжээнд нэмэгдэх вэ” гэдэгт төвлөрч байгаа юм.