Орхон аймгийн Засаг даргын захирамжаар аймгийн Засаг даргын орлогч Б.Мөнхдалайн 50 насны төрсөн өдрийг тохиолдуулан хүндэтгэл үзүүлэхээр өнгөрсөн оны 11 дүгээр сард шийдвэр гаргажээ.

Захирамжид дурдсанаар, төрийн албанд тогтвор суурьшилтай, үр бүтээлтэй ажилласан хэмээн үнэлж, Б.Мөнхдалайд хүндэтгэл үзүүлэхээр болсон бөгөөд үүнд шаардагдах нэг сая төгрөгийг аймгийн Засаг даргын Тамгын газрын нэг удаагийн тэтгэмж, урамшууллын зардлаас гаргахаар тусгасан байна.

Энэхүү шийдвэрийг Монгол Улсын Засаг захиргаа, нутаг дэвсгэрийн нэгж, түүний удирдлагын тухай хууль, Засгийн газрын тогтоолоор баталсан “Төрийн албан хаагчид шагнал олгох журам”, мөн аймгийн Засаг даргын Тамгын газрын дотоод журамд үндэслэн гаргасан аж.