Малын эмч нар төв талбайд тайван жагсаал эхлүүлсэн.  

Энэ үер төрийн ордноос УИХ-ын хоёр гишүүн гарч ирж уулзсан бөгөөд Цагаанхүүгийн Мөнхбат гишүүн дараах мэдээллийг нийтэлсэн юм. Тэрбээр "Өнөөдөр малын эмч нар өөрсдийн салбарт тулгамдаад, хохирч буй асуудлаараа талбай дээр жагсаал хийлээ. Баян-өлгий аймгаас бусад бүх аймгаас малын эмч нар ирж жагсаалт оролцжээ. Нийтдээ 300 орчим малын эмч нар жагсаалд оролцсон байна. Говийн аймгуудаас ирсэн малын эмч ах эгч нараас гарч ирж бидэнтэй уулзах санал ирүүлсэнд хүндэтгэлтэй хүлээн авч Гомбын Ганбаатар гишүүн бид 2 жагсагчдын төлөөлөлтэй уулзлаа. 2025 онд малын вакцинжуулалт хийсэн үйлчилгээний төлбөрөө авч чадалгүй он гаргачихсан байх юм. Уг нь Сангийн сайд Б.Жавхлан 12 сарын 31нд шийднэ гэсэн боловч шийдээгүй юм байна.

Ер нь малын эмнэлгийн салбарт маш олон тулгамдсан асуудлууд байгаа талаар ам уралдан л ярьцгааж байна. Нээрээ л олон асуудал байгааг орон нутагт ажиллаж байсан хүний хувьд би ч сайн мэдэж байгаа. Тэдний ажиллаж амьдрах нөхцөл боломжийг сайжруулж бүрдүүлж өгөхгүй бол мал аж ахуйн орон гэх манай улс нэг л өдөр малын эмчгүй болсон байх вий гэх бодол төрж байлаа. Тулгамдсан асуудлуудыг нь холбогдох яам, албан тушаалтнуудад уламжлах, араас нь хөөцөлдөх, мөн хууль эрхзүйн шинэчлэлд нь хамтран ажиллах болоод бидний уулзалт өндөрлөв.

Манай улсад ер нь болж байгаа салбар нэг ч алга гээд хэлчихэд нэг их буруудахгүй л болж дээ хөөрхий" гэв.