Их сургуулийн багш нар цалин бага учраас ажил хаях талаар төлөвлөж байгаа талаар яригдаж, УИХ-ын гишүүн Д.Бум-Очир "Их сургуулийн багш нарыг судалгааны тендерт оролцуулдаг болмоор байна" гэсэн. 

Тэгвэл өнгөрсөн баасан гарагийн УИХ-ын чуулганы үдээс хойших хуралдаанаар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцлээ. 

Ингэснээр Шинжлэх ухаан, технологийн тухай хуульд нэмэлт, өөрчлөлт оруулах тухай хуульд орж буй гол зохицуулалт нь улсын төсвөөр зарлагдаж буй судалгаа шинжилгээний тендерт төрийн өмчийн их дээд сургуулиуд, эрдэм шинжилгээний байгууллагууд оролцоход тендерийн болон гүйцэтгэлийн баталгаанаас чөлөөлөх, Үндэсний эрдэм шинжилгээний бүтээлийн нэгдсэн санг олон улсын жишигт нийцүүлэн хөгжүүлж, мэдлэгийн дата төв байгуулах, судалгааны их сургуулийн суурийг бэлдэх, судалгааны ажлуудыг эдийн засгийн эргэлтэд оруулах зэрэг боломжийг бүрдэх юм.