УИХ-ын чуулганы өнөөдөр /2025.12.05/-ийн хуралдаанаар Малын индексжүүлсэн даатгалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийн анхны хэлэлцүүлгийг үргэлжлүүлэн хийж, зарчмын зөрүүтэй зургаан санал хураахад гишүүдийн олонх дэмжив. Хуулийн төслийг эцсийн хэлэлцүүлэгт бэлтгүүлэхээр БОХХААБХ-нд шилжүүллээ. Гэр бүлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн хэлэлцэх эсэх асуудлыг үргэлжлүүлэн хэлэлцэж, гишүүдийн олонх буюу 72.1 хувийн саналаар хэлэлцэх нь зүйтэй гэж үзэв.

Гэр бүлийн хэрэг хянан шийдвэрлэх тухай хуулийн төсөл болон хамт өргөн мэдүүлсэн хууль, тогтоолын төслүүдийн хэлэлцэх эсэх асуудлыг үргэлжлүүлэн хэлэлцэж, санал хураахад гишүүдийн олонх буюу 73.9 хувийн саналаар дэмжлээ.

УИХ-ын гишүүн Нанзадын Наранбаатарыг Төсвийн Байнгын хорооны даргаар сонгох Улсын Их Хурлын тогтоолын төслийг хэлэлцэж, гишүүд нэр дэвшигчээс асуулт асууж, хариулт авлаа. Гишүүдийн зүгээс Төсвийн орлого, гүйцэтгэл, валютын нөөц зэрэг эдийн засгийн асуудлаар Сангийн сайдын мэдээллийг сонсож, асуудлаа шийдвэрлэх, ирэх онд хийгдэх хөрөнгө оруулалт, төсвийн бодлого, шинэчлэлд анхаарал хандуулж ажиллах саналыг хэлэв. Байнгын хорооны даргыг сонгох Улсын Их хурлын тогтоолын төслийг гишүүдийн олонх дэмжиж, УИХ-ын гишүүн Нанзадын Наранбаатарыг Төсвийн байнгын хорооны даргаар сонгов.

Засгийн газраас өргөн мэдүүлсэн “Импортын барааны Гаалийн албан татварын хэм хэмжээг батлах тухай” 27 дугаар тогтоолд нэмэлт оруулах тухай Улсын Их Хурлын тогтоолын төслийн анхны хэлэлцүүлгийг хийлээ.