Ерөнхий сайд Г.Занданшатар  /2025.11.22/ өдөр эмнэлгүүдээр явж нөхцөл байдалтай газар дээр нь танилцах үедээ  “ЭМЯ, ХӨСҮТ, НЭМГ зэрэг яам, агентлагуудын дарга нар явж ажилла. Үнэлгээ, датаг бодитой гарга. Тасалгаанд суугаад компьютер дээрээс тоо нэгтгээд яриад байх нь зохимжгүй. Нүдээр үзэж, харж байж бодлого, шийдвэр оновчтой гарна” хэмээн хэлсэн. Өнөөдрийн байдлаар эмнэлэг ачааллаа дийлэхгүй өвчтөнүүдийг шалан дээр хэвтүүлж байхад Эрүүл мэндийн яамнаас 12 дугаар сарын 15 гэхэд томуу, томуу төст өвчин оргил цэгтээ хүрэх “Өндөр эрсдэлтэй” хэмээн танилцуулав.

Үүнтэй зэрэгцэн УИХ-ын гишүүн Ц.Баатархүү Эрчим хүчний сайд Б.Чойжилсүрэн болон Эрүүл мэндийн сайд Ж.Чинбүрэн нарт доорх асуулгуудыг хүргүүлжээ.

Нийслэлчүүдийн “эрлэг” болсон утааны улиралд иргэдийг хамгийн ихээр хордуулдаг ганц зүйл нь төрийн өөрийн эрхлэн явуулдаг бизнес болох сайжруулсан гэх тодотголтой “түлш”.

Энэ түлшээр иргэд хорддог, угаартаж нас бардаг, түлшний чанар маш муу гэх зэргээр хэрэглэгч иргэд хангалттай санал гомдлыг хэлдэг ч хүлээж авч шийдвэрлэдэг газар байхгүй. Иргэдийн санал гомдлын үндсэн дээр тулгуурлаж энэ өвөл урд хөршөөс “хагас коксон түлш” оруулж ирээд тарааж байгаа ч хоруу чанар их байна гэх гомдолтой цаг ямагт тулгарч байна.

Тус асуулгад “хагас коксон түлшний чанар стандартыг хэрхэн баталгаажуулан хянаж буй талаар, агаарын бохирдлыг бодитой бууруулах тооцоо судалгаа бий юу” зэрэг бүхий л асуудлыг тодорхой ойлгомжтой байдлаар тайлбарлаж өгөхийг хүссэн байна.

Харин Эрүүл мэндийн сайд Ж.Чинбүрэнгээс эмийн чанарын тухай, хяналт, нийлүүлэлт ямар байгаа талаар  цаг үеийн асуудлуудыг тусгасан байна. Мөн гурван шатлалын эмнэлгийн ачаалал зэрэг эрүүл мэндийн салбарт “улаан гэрэл” ассан гол гол асуудлыг дурдан хүргүүлжээ.

Томуу томуу төст өвчний дэгдэлт дээд цэгтээ хүрч дүүргийн эмнэлгийн амбулаториор өдөрт 400 гаруй өвчтөн үзүүлж буй өнөө үед эрүүл мэндийн даатгалын мөнгө ямар учраас тасалдаж буй талаар тодруулга өгнө үү хэмээн оруулсан байна. Сургууль, цэцэрлэг каринтилах хэмжээнд хүртэл өвчлөл дэгдсэн байгаа энэ үед Эрүүл мэндийн сайд Ж.Чинбүрэн цаг алдалгүй тус асуулгад хариулт өгч иргэдийг мэдэх эрхээр хангах үүрэг хүлээж байна.