Үндсэн хуулийн цэцийн Их суудлын хуралдаанаар Ерөнхий сайдыг огцруулсан УИХ-ын 95 дугаар тогтоол нь Үндсэн хууль зөрчсөн гэж үзсэн. Улмаар уг тогтоолыг баталсан 2025 оны аравдугаар сарын 17-ны өдрийн чуулганы нэгдсэн хуралдааныг даргалсан УИХ-ын дэд дарга Х.Булгантуяаг “Үндсэн хууль зөрчсөн” гэж үзсэн тул түүнийг дэд даргын албан тушаалаас чөлөөлөхөөр болсон юм.

Харин өнгөрсөн долоо хоногт хуралдсан УИХ дахь МАН-ын бүлгийн ээлжит бус хуралдаанаар Х.Булгантуяаг дэд даргын албан тушаалаас чөлөөлж, оронд нь Ж.Бат-Эрдэнийг нэр дэвшүүлэхээр тохирсон талаар мэдээлсэн байдаг.

Тэгвэл УИХ-ын даргын дэргэдэх зөвлөлийн шийдвэрийн дагуу өнөөдөр 14:00 цагаас хуралдах чуулганы нэгдсэн хуралдаанаар УИХ-ын дэд даргыг чөлөөлөх, шинэ хүнийг томилох асуудлыг хэлэлцэхээр болсон байна.