Хуваарийн дагуу өчигдөр /2025.10.17/ 10.00 цагт эхэлсэн УИХ-ын чуулганы хуралдааны ирц бүрдээгүйн улмаас шөнөжин хүлээгдэж, өнөө өглөө эхэлсэн. Уг хуралдаанаар УИХ-ын гишүүн П.Сайнзориг нарын 55 гишүүний гаргасан Ерөнхий сайдыг огцруулах эсэх асуудлыг хэлэлцлээ. 

Ерөнхий сайд Г.Занданшатар "Өнөөдөр асуултад бүрэн хариулах боломж олдоогүй учраас хэлэх үгээ дуусгахыг хүсч байна. Эдийн засгийн сэргэлт бол зүгээр нэг тоон үзүүлэлт биш. Энэ бол баялгийн хулгай, нүүрсний хулгайтай хийсэн тууштай тэмцлийн үр дүн юм. Бид иргэддээ нээлттэй, хариуцлагатай нийгмийг цогцлоох, эрүүл тогтолцоог төлөвшүүлэх зарчмыг баримтлан ажиллаж ирсэн. Энэ бүхий л тэмцлийн эцэст гарч буй өсөлтийг зөвхөн статистикт үлдээхгүй, харин Монголын өрх бүрт, иргэн бүрт бодит өгөөж болгох нь бидний гол зорилго. Бид Монголын баялгийг дээрэмдсэн хулгайтай тэмцэж, түүний үр дүнд эмч, багш нарынхаа цалин, ахмад настнуудынхаа тэтгэврийг нэмэгдүүлэхийн төлөө ажилласан. Энэ бол манай Засгийн газрын амин сүнс, үйл ажиллагааны гол чиг шугам юм.

Би сандал суудалтай зууралддаг хүн биш. МАН-ын намын олонх гишүүдийн саналаар би Ерөнхий сайдаар томилогдсон. Надад итгэл хүлээлгэж байна гэж ойлгосон. Би гаднын сайтын мэдээлэлд үндэслэн УИХ-ын дарга Д.Амарбаясгаланг гүтгээгүй. Хоёр жилийн өмнө гарсан мэдээллийг яагаад няцаагаагүй юм бэ гэдгийг асуусан. Би улс орноороо наймаалцахгүй. Нүүрсний хулгайч нартай тохиролцохгүй. Өнөөдөр бид уг нь ард түмнийхээ амьдралыг сайжруулах тухай ярих ёстой ч, дөнгөж 100 хоносон Засгийн газраа огцруулах тухай яриад зогсож байна. Хууль ялах уу, хулгай ялах уу гэдэг төрийн тамгатай түүхэн сонголтын өмнө та бүхэн зогсож байна. Монгол Улсад хууль ёс ялах болтугай" гэж хэлээд 111 гишүүний 71 буюу 64 хувийн саналаар огцорлоо.