МАН-ын даргын сунгаа УИХ-ын дарга Д.Амарбаясгалан, Ерөнхий сайд Г.Занданшатар нарын хооронд гүнзгий зөрчил үүсгэж, намын цагаан байрны хүрээнээс хальж төрийн ордонд хүртэл нөлөөлөөд байгаа билээ.

Тус зөрчил намын гишүүдийн байр суурь, фракцийн ашиг сонирхлоос үүдэлтэй бөгөөд УИХ-ын гишүүд болон Засгийн газрын гишүүд хоёр талд хуваагдан, УИХ-ын дарга, Ерөнхий сайдын албан тушаалын асуудалд нөлөөлөх оролдлого хийж буй.

УИХ-ын дарга Д.Амарбаясгалан, Ерөнхий сайд Г.Занданшатар нарын суудал дээсэн дөрөөн дээр дэнжигнэж, Монголын төрийн тогтвортой байдалд нөлөөлөх хэмжээнд хүрээд байгаа юм.

Эх сурвалжийн мэдээлснээр, Ерөнхий сайд Г.Занданшатар, УИХ-ын гишүүн Б.Пүрэвдоржид УИХ-ын даргын суудал амалж, Ж.Баярмааг дэд даргаар томилно гэж амласан гэх мэдээлэл гарсан байна.

Түүнчлэн Засгийн газрын зарим гишүүд парламент тарна гэсэн яриагаар УИХ-ын гишүүдийг дарамталж, улс төрийн шахалт үзүүлж эхэлсэн гэх мэдээлэл ч байгаа юм. Энэ нь парламентийн засаглалд Засгийн газрын гишүүд шууд нөлөөлөх оролдлого хийж байгаа гэсэн шүүмжийг дагуулж байна.