Эрх баригч МАН-ын зодоон цагаан ордноосоо хальж саарал ордон уруу шилжсэнээр монгол төрийн зодоон болж хувирав.

Засгийн газрыг огцруулах гарын үсэг дээр их хурлын дарга Д.Амарбаясгалангийн тал 56 санал хураагаад байгаа бол Д.Амарбаясгаланг өөрийг нь огцруулах Д.Энхтүвшин гишүүний бланк дээрх тоо 62 хүрээд зогссон гэж эх сурвалж мэдээлж байна. Нэгэнт гацсан гацааг гаргахаар их хурлын дарга Д.Амарбаясгалан намын дарга Л.Оюун-Эрдэнээ дагуулж ерөнхийлөгч дээр орсон ч уулзалт үр дүнд хүрэхгүй “ажлаа өгөөд Англи уруугаа явцгаа” гэсэн хариуг сонсжээ.               

  Ингээд МАН-ын даргын төлөөх төрийн зодооны эцсийн ялагчийг их хурлын цөөнхийн бүлэг буюу АН-аас сонгогдсон гишүүд шийдэх нь бүгдэд тодорхой болсон. Тийм ч учраас хоёр талаас АН-ын бүлгийн гишүүдийг өөр өөрийн талд татахаар хөшигний цаана ажиллаж эхэлсэн нь намын шинэхэн дарга О.Цогтгэрэлийг сандаргаж нуман тулгуурт оруулсан байна. АН-ын бүлэг хоёр хуваагдах эрсдэлд орж дотроос Д.Амарбаясгаланг шууд дэмжсэн “нүүрсний 13” гэх фракц албан бусаар мэндэлжээ. Тэднийг нэгтгэх ажлыг өмнөх танхимын сайд нар болох Лу.Гантөмөр, Ц.Туваан нар голлон зохион байгуулж байгаа гэсэн мэдээлэл АН-ын бүлгийн гишүүдийн дунд ил болсон.                  

Тэгвэл дахин нэг ноцтой мэдээлэл төрийн ордонд түгж эхэлсэн нь эдгээр “нүүрсний 13”-ийн доторх зарим гишүүдэд Д.Амарбаясгалангийн нүүрсний мөнгөнөөс 200,000 ам.доллар бэлнээр өгч эхэлсэн гэх ноцтой мэдээлэл юм. Хэрвээ энэ мэдээлэл үнэн бол АН-ын гишүүд үүгээр явсан гайг түүгээр дуудаж МАН-ын зодоонд хутгалдан орох эрсдэлд орж байна. Бид энэ мэдээллийн талаар АН-ын бүлгийн гишүүдийн байр суурийг асууж тодруулга хийхээр ажиллаж байна.