Б.Энхбаяр Д.Амарбаясгаланг Адмирал ХХК-тай хамаарал бүхий хэд хэдэн мэдээллийг олон нийтэд хүргээд байгаа билээ. Тодруулбал, Тавантолгойн нэг хэсэг Бор тээгийн ордод нүүрс баяжуулах үйлдвэр барих тендерт ялсан "Админерал" гэх компанийг Амарбаясгалангийнх. Мөн түүнчлэн “Админерал” ХХК-ийн захирал Насан-Уртын Хасбатарын нас барсан асуудалд хамааралтай зэрэг мэдээллүүд цацагдаад буй.

Дээрх асуудлын талаар УИХ-ын дарга Д.Амарбаясгалан Цагдаагийн Ерөнхий газрын дарга, дотоодын цэргийн командлагч, Бригадын генерал Т.Сүхболдод  дараах хүсэлтийг гаргажээ.

Ингэхдээ, “Монгол Улсын Их Хурлын гишүүн Баттөмөрийн Энхбаяр нь удаа дараа хэвлэл мэдээллийн байгууллага болон өөрийн цахим хуудсаараа дамжуулан Дашзэгвийн Амарбаясгалан намайг “Админерал” ХХК-ийн захирал Насан-Уртын” Хасбатарын нас барсан асуудалд холбогдуулан илт үндэслэлгүй, гүтгэлгийн шинжтэй худал мэдээлэл олон нийтэд тараасан байна.

Түүнчлэн хэвлэл мэдээллийн байгууллага болон олон нийтийн цахим хэрэгслээр Админерал ХХК-ийн захирал Н.Хасбатарын нас барсан асуудлаар Монгол Улсын Их Хурлын дарга Д.Амарбаясгалан шалгагдаж байгаа талаарх мэдээлэл цацагдаж байна. Иймд “Админерал” ХХК-ийн захирал Хасбатарын гэх хүнийг нас барсантай холбоотой асуудалд мөрдөн шалгах ажиллагаа явуулж байгаа эсэх, тухайн хэрэгт Д.Амарбаясгалан намайг холбогдуулан шалгаж байгаа эсэх мэдээллийг өгнө үү” гэсэн байлаа.

Харин үүний хариуд Тэргүүн дэд дарга, Бригадын генерал, Ц.Ням-Очир “Өмнөговь аймгийн Цогтцэций сумын 3 дугаар багийн нутаг дэвсгэрт байрлах “Админерал” ХХК-ийн ажилчдын байранд 2025 оны 02 дугаар сарын 12-ны өдөр Холбооны Бүгд Найрамдах Герман Улсын иргэн Н.Хасбатар нас барсан гэх мэдээлэлд тус аймгийн цагдаагийн газрын Цогтцэций сумын сум дундын цагдаагийн хэлтсээс мөрдөн шалгах ажиллагаа явуулж, мөн оны 03 дугаар сарын 02-ны өдөр Эрүүгийн хэрэг хянан шийдвэрлэх тухай хуулийн 1.5 дугаар зүйлийн 1 дэх хэсгийн 1.1 дэх заалтад заасан гэмт хэргийн шинжгүй үндэслэлээр хэрэг бүртгэлтийн хэрэг нээхээс татгалзах саналтай прокурорын байгууллагад хүргүүлсэн болохыг үүгээр мэдэгдье” гэжээ.