УИХ-ын дарга Д.Амарбаясгалан өнөөдөр /2025.09.12/ улс төрд өрнөж буй үйл явцтай холбогдуулж мэдэгдэл хийлээ. Энэ үеэрээ тэрбээр, "Татварын багц хуультай холбоотой асуудлаар яригдаж байна. Сүүлийн жилүүдэд татварын хувь хэмжээтэй асуудлаар иргэд, бизнес эрхлэгчдийн зүгээс олон талын санал хүсэлт, гомдлыг гаргаж байна. Өнөөдөр засгийн газраас өргөн баригдхаар бэлтгэгдээд парламентын сайт дээр тавигдаж, иргэдийн саналыг авч байгаа тэр төслийг харж үзлээ. Яг үнэндээ иргэдийн хүсэж байгаа хэмжээний томоохон өөрчлөлтийг хийж чадхааргүй хэмжээний төсөл явж байна гэж миний хувьд дүгнэж байна. Одоо татварын багц хуулинд бид КОСМЕТИК хэлбэрийн өөрчлөлт хийснээр бизнес эрхлэгчид болон ард иргэдэд дэмжлэг үзүүлэх татварын хөнгөлөлт авчрах боломж бүрдэхгүй гэж үзэж байгаа юм. 

Өнөөдөр монгол улсад татварын реформ хэрэгтэй гэдэгт бид санал нэгдэх ёстой. Монгол улс татвараар орлогоо бүрдүүлж, бүрдүүлсэн орлогоороо зардлаа гаргадаг ганцхан аргачлалтай улс. Гэтэл өндөр хөгжилтэй улс орнуудын жишээг харахад татварыг юуны төлөө авдаг юм, татварыг юуны төлөө хөнгөлдөг юм, ямар учраас бизнесийг дэмжих дээр тэр татварын бодлогыг хэрэгжүүлдэг юм бэ гэдэг маш тодорхой зүйл байна. Тийм учраас УИХ энэ удаагийн намрын чуулган дээр татварын хуулиудад нэмэлт өөрчлөлт биш, реформын шинжтэй томоохон өөрчлөлтийг хийх санаачилгыг гаргаж ажиллана гэдгийг хэлмээр байна" гэлээ.