Монголын багш нарын үйлдвэрчний хорооноос Боловсролын сайд П.Наранбаярыг огцруулах шаардлагыг Төрийн албаны зөвлөлд хүргүүлжээ.

Тус шаардлагад "Монголын багш нарын үйлдвэрчний эвлэлийн холбооноос 2025 оны 02 дугаар сарын 05-ны өдөр Боловсролын сайд П.Наранбаярын Баян-Өлгий аймгийн Боловсролын газрын даргын үүргийг түр орлон гүйцэтгэгчээр Б.Айдыныг хууль зөрчин томилсон асуудлаар Монгол улсын төрийн албаны зөвлөлд хандан гомдол гаргаж байсан. Энэхүү гомдлын дагуу Монгол Улсын Төрийн албаны зөвлөлийн 2025 оны 05 дугаар сарын 30-ны өдрийн 227 дугаар тогтоол гарч, хувийг манайд хүргүүлжээ.

Тогтоолын 1 дүгээр зүйлд Төрийн албаны зөвлөлийн 2025 оны 15 дугаар хуралдаанаар Баян-Өлгий аймгийн төрийн захиргааны зарим байгууллагын төрийн жинхэнэ албан хаагчийг сонгон шалгаруулж, томилох үйл ажиллагаанд хяналт, шалгалт хийсэн ажлын хэсгийн тайланг хянан хэлэлцээд Боловсролын сайдын 2025 оны 01 дүгээр сарын 31-ний өдрийн "Байын Айдынаар албан үүргийг түр орлон гүйцэтгүүлэх тухай" Б/05 дугаар тушаал нь Төрийн албаны тухай хуулийн 23 дугаар зүйлийн 23.2.3 дахь заалт, 25 дугаар зүйлийн 25.1 дэх хэсэг, 27 дугаар зүйлийн 27.1.1 дэх заалт, 33 дугаар зүйлийн 33.3 дахь хэсэг, 43 дугаар зүйлийн 43.3.3, 43.3.4 дэх заалтад тус тус зөрчсөнийг тогтоосон байх бөгөөд 2 дугаар зүйлд Боловсролын сайдын 2025 оны 01 дүгээр сарын 31-ний өдрийн "Байын Айдынаар албан үүргийг түр орлон гүйцэтгүүлэх тухай" Б/05 дугаар тушаалыг Захиргааны ерөнхий хуульд заасан шийдвэр гаргах ажиллагааны журамд нийцүүлэн хүчингүй болгож, биелэлтийг 2025 оны 7 дугаар сарын 1-ний өдрийн дотор Төрийн албаны зөвлөлд ирүүлэхийг Боловсролын сайд (П.Наранбаяр)-д даалгасугай гэжээ.

Гэтэл өнөөдрийг хүртэл Баян-Өлгий аймгийн Боловсролын газрын даргын үүргийг түр орлон гүйцэтгэгчээр Б.Айдын гэгч нь үүрэгт ажлаа хийсээр байгаа нь Монгол Улсын Төрийн албаны зөвлөлийн 2025 оны 05 дугаар сарын 30-ны өдрийн 227 дугаар тогтоол хэрэгжээгүйг нотлон харуулж байна. Мөн Тогтоолын 3 дугаар зүйлд "Төрийн албаны зөвлөлөөс тогтоосон хугацаанд дээрх шийдвэрийг хүчингүй болгоогүй, эсхүл шийдвэрийг хүчингүй болгосон боловч дахин хууль зөрчиж иргэнийг төрийн жинхэнэ албан тушаалд томилсон тохиолдолд Төрийн албаны тухай хуулийн 32 дугаар зүйлийн 32.1 дэх хэсэгт заасны дагуу хууль бус шийдвэрийг хүчингүй болгож, буруутай албан тушаалтныг үүрэгт ажлаас чөлөөлөх мэдэгдлийг томилох эрх бүхий этгээдэд хүргүүлж, төрд учруулсан хохирлыг уг шийдвэрийг гаргасан буруутай албан тушаалтнаар нөхөн төлүүлэхийг урьдчилан мэдэгдсүгэй гэсэн шийдвэрээ биелүүлэх шаардлага зүй ёсоор урган гарчээ.

Иймд Монгол улсын Төрийн албаны зөвлөлөөс гаргасан 2025 оны 05 дугаар сарын 30-ны өдрийн 227 тоот тогтоолоо хэрэгжүүлж, Төрийн албаны тухай хуулийн 32 дугаар зүйлийн 32.1, 32.7 дахь заалтыг тус тус баримтлан Боловсролын сайд П.Наранбаярын Баян-Өлгий аймгийн Боловсролын газрын даргын үүргийг түр орлон гүйцэтгэгчээр Б.Айдыныг томилсон тушаалыг хүчингүй болгож, Боловсролын сайд П.Наранбаярыг үүрэгт ажлаас нь чөлөөлөх мэдэгдлийг Монгол Улсын Ерөнхий сайд Г.Занданшатарт хүргүүлэхийн хамт Боловсролын сайд П.Наранбаярын төрд учруулсан хохирлыг нөхөн төлүүлэх шаардлагыг хүргүүлж байна. Таныг манай шаардлагын хариуг 2025 оны 09 дүгээр сарын 15-ны дотор бичгээр ирүүлэхийг хүсье" гэжээ.