НИТХ-ын төлөөлөгч Л.Хосбаяр өчигдөр “Өнөр бүл” төвд амьдарч буй хүүхдүүдийн хичээлийн шинэ жилийн нээлтэд оролцож, тэнд байсан хүүхдүүдийн зургийг олон нийтийн сүлжээндээ нийтлэхийн хажуугаар “Энэ өдөр буян хураалаа. Тамын хаалга хаалттай ганц өдөр. Та бүхэн ч бас буян хураагаарай” гэсэн утгатай тайлбарыг бичсэн байв.

Гэвч энэ үйлдэл нь ёс зүй, хүний эрхийн талаас олон асуулт дагуулж байна. Нэгдүгээрт, асрамжийн газрын хүүхдүүд бол хамгийн эмзэг, хамгаалалт шаарддаг бүлэг. Тэдний дүр төрх, царай зургийг олон нийтэд зөвшөөрөлгүйгээр дэлгэн харуулах нь хүүхдийн эрхийг ноцтой зөрчдөг. Хүүхдийг улс төрийн пиар, хувь хүний нэр хүнд өсгөх хэрэгсэл болгон ашиглаж байгаа мэт харагдаж байгаа нь харамсалтай.

Нийгмийн өмнө хариуцлага хүлээдэг төлөөлөгч хүний хувьд “хүүхдэд тусалж байна” гэхээсээ илүү “өөрийгөө сурталчилж байна” гэсэн сэтгэгдэл төрүүлэхүйц үйлдэл гаргасан нь ёс зүйгүй, зохисгүй алхам гэж үзэхээс аргагүй.

Хүүхдийн эрхийг хүндэтгэж, хамгаалах нь зөвхөн асрамжийн газрын биш, нийгмийн бүх шатны байгууллага, хувь хүний үүрэг. Харин эрх мэдэл бүхий хүмүүс өөрийн PR-д зориулан ийм эмзэг асуудлыг ашиглаж байгаа нь үнэхээр харамсалтай дүр зураг юм.