Баянхонгор аймгийн Шинэжинст сумын нутагт байрлах Хотгорын нүүрсний уурхайн ашиглалтын тусгай зөвшөөрөл эзэмшигч “Сэкер ресорсус Монголиа” ХХК нь уурхайн байрлалаас “Нарийн сухайтын” бүлэг орд хүртэл 295 км авто зам барих төслийг хэрэгжүүлж байгаа бөгөөд тус гүйцэтгэгчээр ЗХ-ний Барилга инженерийн удирдах газрын харьяа 110, 314 дүгээр ангиуд ажиллаж байна.

“Сэкер ресорсус Монголиа” ХХК нь зам тавих нэрийдлээр “Говь гурван сайхан тусгай хамгаалалттай бүс”, “Тос тосон бумбын тусгай хамгаалалттай бүсийг” сэтлэх гэж байгаа асуудал хөндөгдөөд байгаа юм.

Энэ талаар Зам тээврийн сайд Б.Дэлгэрсайхан авто зам барих төсөлд зөвшөөрөл өгсөн эсэх талаар   “Ер нь хэн зам тавина гэнэ. Бүх хүнд зөвшөөрөл өгнө. Түүнээс өөр юм байхгүй. Говь гурван сайхан тусгай хамгаалалттай бүс гэдэг нь худлаа. Тэр дайрахгүй ээ. Хэрвээ тийм газраар дайрч байвал цуцалчихна” зэргээр ярьж байв.

Мөн уг асуудлаас гадна тухайн газрын ажил явагдаж байх хугацаанд гурван хүний амь эрссэн талаар ч эх сурвалж мэдээлсэн юм. Тус осол нь Гурван тэс сумын төвөөс 11.5 км-т “Секерресорсус Монголиа ХХК”-ийн замын төслийн технологийн зам дээр гарчээ.

Тодруулбал, төсвийн туслан гүйцэтгэгчээр ажиллаж буй 110 дугаар ангийн хово маркийн тээврийн хэрэгсэл приус 20 маркийн тээврийн хэрэгсэлтэй мөргөлдсөн осол өнгөрсөн зургаадугаар сарын 02-ны өдөр гарсан ба тус ослоос үүдэн Приус 20 маркийн машинд зорчиж байсан 3 эрэгтэй нас барж, 2 хүүхэд яаралтай нисдэг тэргээр Өмнөговь аймаг дахь Бүсийн оношлогоо эмчилгээний төвд хүргэгдсэн байна.

Ослын газрын хэмжилт, урьдчилсан дүгнэлтээр приус 20 маркийн тээврийн хэрэгслийн жолооч согтууруулах ундааны зүйл хэрэглэсэн, урсгал сөрсөн байж болзошгүй ба шинжээчийн дүгнэлт эцсийн байдлаар гараагүй байна.

Энэ мэтчилэн тусгай хамгаалалттай бүсэд нэвтэрч газар сэтэлж, гурван ч хүний амь эрсэдсэн байхад чухам үйл ажиллагаагаа үргэлжлүүлэн явуулж байгаад нутгийн ард иргэд ихэд бухимдалтай байгаа аж. Мөн энэ ажлын цаана улс төрийн хамаарал бүхий бүлэглэл ч байж болзошгүйг дараах мэдээллээс харж болох юм.

“Сэкер ресорсус Монголиа” нь Монголд хамгийн том газартай гадаадын 15 компанийн нэг. Мөн цаашлаад уг компанийн хамаарал бүхий хүмүүс дунд Ерөнхийлөгч асан Х.Баттулга, Одоогийн Ерөнхий сайд Г.Занданшатар, Т.Доржхандын төрсөн ах Т.Лувсандорж тэргүүтэй хүмүүс нэр холбогдож байна.

“Сэкер ресорсус Монголиа” нь Баянхонгор аймгийн Шинэжинст сумын газар нутаг, “Эхэн Хавцгайтын ам” гэх газар байрлах 8 лиценз, зөвшөөрөх бүхий газрууд Сингапур улсад бүртгэлтэй “Saker Resources Pte.Ltd”-д зарагдаж байжээ.

Тус газруудыг эзэмшдэг “Гобикоул энд энержи” ХХК нь нэрээ солин “Сэкер ресорсус Монголиа” ХХК болсон байдаг. Тус компанийн хувьцаа эзэмшигч компани буюу эцсийн өмчлөгч нь 2024.01.11-ний өдөр өөрчлөгджээ. “Сэкер ресорсус монголиа” ХХК-ийн эцсийн өмчлөгч нь Joceph Keith Borkowski гэгч болж байсан бол тус оны 10 сард Б.Баттуул одоогийн захирлаар томилогдсон байдаг.

“Сэкер ресорсус монголиа” ХХК Баянхонгор аймгийн Шинэжинст сумын 1, 2, 4, 5-р багт нийт 48,312,194м2 талбайтай 13 газрыг эзэмших эрхтэй. “Сэкер ресорсус монголиа” ХХК-ийг Сингапурын “Saker recources” компани эзэмшдэг, эцсийн өмчлөгчөөр нь Жосеф Борковски бүртгэлтэй байдаг.   “Сэкер ресорсус Монголиа” хамтарсан хөрөнгө оруулалтай ХХК нь:

1. Адаг MV-021487,
2. Байц MV-021488,
3. Асгат MV-017438,
4. Адаг MV-017057, Хотгор зүүн MV-017060,
5. Хотгор баруун MV-017061,
6. Байц MV-017062,
7. Хонгор MV-012728,
8. Шар хоолой MV-014217,
9. Шар хоолой MV-011965,
10. Зээгт MV-000905,

Хонхор дэрс XV-01765 зэрэг 12 лиценз эзэмшдэг. Өмнө нь “Гобикоул энд энержи” нэртэй байсан энэ компанийн хувьцааг Сингапурын Saker Resources Pte.Ltd эзэмшдэг. Гүйцэтгэх захирал нь Б.Баттуул, эцсийн өмчлөгч нь татан буугдсан гэх мэдээлэлтэй М.Баярманлай захиралтай “Мөнхтун болор” ХХК, М.Чойдорж захиралтай “Гобиконсолидетед” гэсэн компаниуд байна.

Салхитын мөнгөний орд ихээхэн ашиг олж, Ерөнхийлөгч асан Х.Баттулга, Одоогийн Ерөнхий сайд Г.Занданшатар нар тэтгэврийн зээлийг тэглэж байсан цаг саяхан. Мөн  Т.Мөнхбаяр  “Империалкастел” ХХК-аар нэр холбогдож байна. Тодруулбал "Сэкер ресурс" компанийн хувьцаа эзэмшигч УАН партнерс компанийн захирал О.Соронзонболдын "Империалкастел" компанийн нэгэн томоохон хувь эзэмшигч нь Х.Баттулга, Г.Занданшатар нарын ойрын хүн болох Т.Мөнхбаяр байж таарав. Хамгийн ноцтой нь Т.Мөнхбаярын "Зараяахолдингс" компанийн хувь эзэмшигчээр "Сэкер ресурс" бүртгэлтэй байна.

Мөн "Сэкер ресорсус монголиа" ХХК бол УИХ-ын гишүүн Т.Доржхандын төрсөн ах Т.Лувсандоржтой хамаарал бүхий. Тодруулбал, Сингапурын уг компанид Т.Лувсандорж зөвлөх, дэд захирал зэрэг албан тушаалуудад сэлгэн ажиллаж байгаа аж.