Ардчилсан намын ҮБХ-ны ээлжит бус хуралдаан өнөөдөр боллоо. УИХ-ын гишүүн Ж.Баярмаа цаг үеийн асуудлаар дараах мэдээллийг өглөө.

Тэрээр хэлэхдээ,"Би ялалтын төлөө өрсөлдөж байна. Өнөөдөр Монгол Улсад болохгүй байгаа зүйлс нь болж байгаа зүйлээсээ давсан. Ядуурал, ажилгүйдэл буурахгүй, эдийн засаг доройтсоор, шударга ёс, авилга арилахгүй хэвээр байна. Эдгээрийг шийдвэрлэх гол тоглогч бол улс төрийн нам. Сонгогчид намуудад итгэл хүлээлгэн эрх мэдэл өгч, нам засгийн газрыг байгуулан бодлого хэрэгжүүлдэг. Гэтэл өнөөдрийн бодит байдал бол намуудын дотоод ялзрал, авилга, мөнгөний сүлжээтэй холбоотой. Тиймээс бид улс орноо хөгжүүлж, дорвитой өөрчлөлт хийхийн тулд эхлээд улс төрийн намуудаа шинэчлэх ёстой. Нам дотроосоо цэвэршиж байж улс хөгжинө. Улс орны шинэчлэлийг зөвхөн “нам шиг нам” авч явна.

Хэрэв би намын даргаар сонгогдвол дээр дурдсан асуудлуудыг шийдэхийн төлөө ажиллана. Нам дотор шинэчлэл хийж, төрийн бодлогод бодит нөлөө үзүүлэхийн тулд би нэр дэвшиж байна" гэв.