Ардчилсан намын дараагийн даргад  УИХ-ын гишүүн Л.Мөнхбаясгалан албан ёсоор нэрээ дэвшүүлж буйгаа өөрийн цахим хуудсаараа дамжуулан зарлалаа.

НАДАД АД ҮЗЭГДЭХ ЗОРИГ БАЙНА

Тиймээ, надад ад үзэгдэх зориг байна. Учир нь би АН -ын даргад нэрээ дэвшүүлэхээ албан ёсоор зарлаж байна. Дөрвөн сонгууль (2016, 2020, 2021, 2024 ) дараалан ялагдсан АН -ын гишүүд ээ, ад үзэгдэж Монголын төрөөс хавчигдан зайлуулагдсан АН-ын гишүүд дэмжигчид ээ…АН -ын цэнхэр тугтнууд аа… өнөөдөр АН улс төрийн түүхээс арчигдах эсэхээ шийдвэрлэх цаг үеийн босгонд тулж ирлээ. АН-ын үндсэн дүрмийн шинэчлэл, АН -ын даргын сонгуулийг хамтад нь 8- р сарын 28-наас Үндэсний бодлогын хороогоор хэлэцүүлсэн болоод 31 нд санал хураан шийдээд, үдээс хойш нь намын Их хурал нь батламжлахаар болов. Үндэсний хэмжээний том намын хувь заяаг шүлсээ хаяхаас ч амархан шийдчихээд бүрээ бөмбөрөө нүдээд тарж одох нь ээ.

Бид сайн муугаа ярихгүй юмуу… 2016 оноос хойш намын хоёр тамганы асуудал үүсэж гурван ч даргаа дээд шүүхээр батлуулж чадаагүй гашуун түүхээ давтахгүйн тулд, МАН-аас хараат байдгаа болихын тулд, дөрвөн сонгууль дараалан ялагдалд хөтөлсөн ҮБХ -ныхоо шинэчлэлийг хийж анхан шатныхаа гишүүдийн дуу хоолойг сонсохгүй юм уу… Дээрэмдүүлсэн эрх чөлөө, худалдагдсан ардчиллаа эргүүлэн авч коммунист намд дагаар орж тайган нь болсон дарга нартайгаа хариуцлага тооцохгүй юм уу… АН хөдөө сумдад, багт ялалт байгуулсаар ирсэн, гэвч мөнгө их тараадаг төв суурин газарт ямагт ялагдал хүлээж буйгаа дүгнэхгүй юм уу. Уул уурхайд нүүрлэсэн хямрал улстөрийн намд нөлөөлж , намын дээр компани суудаг болж, Монголын төрийг өдрийн хоол шигээ захиалж байгааг таслан зогсоохгүй юм уу. Сонгууль бүрээр сэтгэл зүрхээ цэнхэр тугтайгаа хамт сэмэртэл гүйдэг жирийн гишүүдээ дахиад хуурах уу… Үеийн үед УИХ -д сонгогдсон эмэгтэйчүүдээс АН-ын хүүхнүүд л манлайлал үзүүлсээр ирсэнийг АЭХ мартлаа гэж үү.

АН -ын гишүүдээ, дөрвөн сонгуульд дараалан ялагдсан цэнхэр тугтнууд аа …. бид хэдий болтол үхсэнтэй адил амьдрах юм бэ. Одоо бидэнд ядуу амьдрал, улстөрийн хогийн саванд хаягдсан нэрнээс өөр алдах юм юу байгаа билээ. УИХ- ын сонгуульд ялалт байгуулах гэж биш МАН -ын “халаасны өрөө”-нд саатаж “хамтарсан засаг байгуулж бидний оруулаач” гэж гуйсаар суух уу. Ерөнхийлөгчийн сонгуульд цагаан хуудсанд ялагддаг намын даргатай баймаар байна уу… Хэрэв энэ улс орныг, энэ намыг эрчүүд нь авч явж чадахгүй юм бол одоо бүсгүйчүүд нь авч явья. Би ардчилал, эрх чөлөөнд хайртай. Тиймээс АН -ын гишүүн болж , 2024 оны УИХ-ын сонгуульд жагсаалтаар нэр дэвших боломж байсан ч “даргаар биш ард түмнээрээ шийдүүлье” гээд эмэгтэй хүн нэр дэвшихээс халширч байсан говийн бүсийг өөрөө сонгож, 7 мандатаас 4 өөр сонгогдож араасаа 3 эрэгтэй гишүүн дагуулан Монгол төрийн босгыг алхсан парламентын эмэгтэй гишүүн. Надад ялагдах гэсэн ойлголт байдаггүй. Би ялагдаж үзээгүй. Миний зүрх сэтгэлд зөвхөн ялалт оршдог. АРДЧИЛСАН НАМ ЯЛДАГ НАМ БАЙХ ЁСТОЙ. Ардчилсан намын бодлого айл бүрт хүрдэг байх учиртай.

Би уул уурхайн компаниас дэмлжэг авдаггүй, гэмт хэргийн бүлэглэлд дагаар орж барьцаалагдаагүй. Би тендер аваагүй. Лиценз зараагүй. Албан тушаал наймаалцаагүй. ЖДҮ авч банк тоноогүй. Бусдын боломжийг хулгайлаагүй. Надад МӨНХБАЯСГАЛАН гэдэг нэр л байна. Надад АН-ын цэнхэр батлах байна. Говийн наранд гандсан цэнхэр тэрлэг минь байна. Надад төрийн сүлдэнд өргөсөн сахих учиртай тангараг байна. Тиймээс АН -ын даргад нэрээ дэвшүүлж АД ҮЗЭГДЭХ ЗОРИГ бас байна. Та бүхэнд ч энэ зориг бий. АН -аа шинэчилж , Монголын төрийг цэвэрлэж, эх орноо өөд нь татья. Барагдахаас наагуур болсон эх орноо барилдахаас цаагуур явж бүсгүйчүүд нь авч үлдье. Хамтдаа ЯЛДАГ, хамтдаа ШИЙДВЭР гаргадаг, жирийн гишүүдээ СОНСДОГ, төрийн эрхийг авсан шиг авч , барьсан шиг барьдаг ҮНДЭСНИЙ ХЭМЖЭЭНИЙ НАМ байхын төлөө ХАМТДАА АД ҮЗЭГДЭГДЭХ ЗОРИГТОЙ байцгаая.

Намын шинэчлэлд уриалсан

АН ын ҮБХ -ны гишүүн

УИХ-ын гишүүн Л.Мөнхбаясгалан