Нийслэлийн Засаг даргын 2025 оны наймдугаар сарын 1-ний өдрийн захирамжаар нийслэлд түүхий нүүрс хэрэглэхийг бүрэн зогсоож, ахуйн болон аж ахуйн нэгжүүдийг баяжуулсан нүүрс (мидлинг)-ийн хэрэглээнд бүрэн шилжүүлэхээр болжээ.

Захирамжийн дагуу:

• Ахуйн болон аж ахуйн нэгжүүд түүхий нүүрс хэрэглэхгүй байх, зөвхөн баяжуулсан нүүрс ашиглах,
• Баяжуулсан нүүрсний нийлүүлэлт, түгээлтийг тогтвортой байлгах ажлыг “Тавантолгой түлш” ХХК хариуцах,
• Уурын болон усан халаалтын зуухнуудад технологийн үнэлгээ хийж, үе шаттайгаар баяжуулсан нүүрс хэрэглэх төлөвлөгөө батлуулах,
• Захирамжийн хэрэгжилтийг хангах ажлыг нийслэлийн Агаар, орчны бохирдлыг тэмцэх газар болон Мэргэжлийн хяналтын газар хянан ажиллахаар тусгажээ.

Ийн ирэх есдүгээр сарын 15-наас өмнө нийслэлийн хэмжээнд түүхий нүүрсний хэрэглээ бүрэн зогсож, иргэд, аж ахуйн нэгжүүд баяжуулсан нүүрс хэрэглэх журамд шилжих аж. 

Нэмж дурдахад, 2024–2025 оны өвлийн улиралд Улаанбаатар хотын өрх, аж ахуйн нэгжүүд нийтдээ 87 мянга гаруй тонн Багануурын ангилан ялгасан нүүрс түлсэн байна. Судалгаагаар энэ хэмжээний нүүрс нь агаарт ялгаруулж буй бохирдлоороо 350 мянга гаруй тонн хагас коксон шахмал түлш хэрэглэсэнтэй адил агаарыг бохирдуулж байгаа аж. Энэ нь нийслэлийн агаарын бохирдлын түвшинг мэдэгдэхүйц нэмэгдүүлж, иргэдийн эрүүл мэндэд сөргөөр нөлөөлөх эрсдэлтэй гэдгийг мэргэжилтнүүд онцолж байна.

Иймээс Засгийн газар, нийслэлийн удирдлагууд түүхий нүүрсний хэрэглээг бүрэн зогсоох зорилт тавьж, 2025 оны есдүгээр сарын 15-наас эхлэн өрх, байгууллагуудыг зөвхөн баяжуулсан нүүрс хэрэглэх журамд шилжүүлэхээр төлөвлөжээ.