ИЗНН-аас жагсаалтаар сонгогдсон УИХ-ын гишүүн М.Нарантуяа-Нара намрын чуулган эхлэхэд гишүүний ажлаа өгнө гэж цахим хуудсаараа дамжуулан мэдэгдээд буй. 

УИХ-ын гишүүн бүрэн эрхээсээ түдгэлзэх асуудлыг Монгол Улсын Их хурлын тухай хуулиар зохицуулна. Тус хуулийн 9 дүгээр зүйлд гишүүний бүрэн эрх хугацаанаас өмнө дуусгавар болох асуудлыг зохицуулжээ.

ХУУЛИЙН ЗААЛТ:

9.1.УИХ-ын гишүүний бүрэн эрхийг дараах тохиолдолд түдгэлзүүлэх эсэх асуудлыг УИХ шийдвэрлэнэ:

9.1.1.гэмт үйлдлийнх нь явцад, эсхүл гэмт хэргийн газарт нотлох баримттай нь баривчилж, улмаар бүрэн эрхийг нь түдгэлзүүлэх тухай саналыг Улсын ерөнхий прокурор УИХ-д оруулсан;

9.1.2.гишүүнд холбогдуулан эрүүгийн хэрэг үүсгэсэн бөгөөд Улсын ерөнхий прокурор түүний бүрэн эрхийг түдгэлзүүлэх тухай саналыг УИХ-д оруулсан.

Өөрөөр хэлбэл УЕП санал оруулсан нөхцөлд эл асуудлыг УИХ хэлэлцэн шийдвэрлэдэг байна. 

ХОЁР: Өөрийн хүсэлтээр бүрэн эрхээ хугацаанаас нь өмнө дуусгавар болгоно

Харин тус хуулийн 10 дугаар зүйлд, “УИХ-ын гишүүний бүрэн эрх хугацаанаасаа өмнө дуусгавар болох” гэсэн хэсэгт “өөрийн хүсэлтээр” гэсэн үг бий. Тодруулбал:

1. Ерөнхийлөгчөөр сонгогдсон
2. Хүндэтгэн үзэх шалтгаанаар чөлөөлөгдөх хүсэлтээ өөрөө гаргасныг УИХ хүлээн зөвшөөрсөн
3. Хүндээр өвчилсний улмаас бүрэн эрхээ хэрэгжүүлэх боломжгүй болсон тухай эмнэлгийн дүгнэлт гаргасныг үндэслэн цаашид гишүүний бүрэн эрхээ хэрэгжүүлэх боломжгүй гэж УИХ үзсэн
4. Үндсэн хуулийн цэц Үндсэн хуулийн Жаран зургадугаар зүйлийн 2 дахь хэсгийн 4-т зааснаар гишүүнийг эгүүлэн татах үндэслэлтэй гэсэн дүгнэлт гаргасныг УИХ хүлээн зөвшөөрсөн
5. Үндсэн хуулийн цэц гишүүнийг энэ хуулийн 7.2-т заасан тангаргаасаа няцаж Үндсэн хууль зөрчсөн гэсэн дүгнэлт гаргасныг УИХ хүлээн зөвшөөрсөн
6. Гишүүн гэмт хэрэг үйлдсэн болох нь шүүхийн хүчин төгөлдөр шийтгэх тогтоолоор тогтоогдсон
7. Нас барсан тохиолдолд тус тус гишүүний бүрэн эрх хугацаанаасаа өмнө дуусгавар болдог байна.