Энэ жилийн элсэлтийн шалгалтад "Тамгагүй төр" жүжгийн талаарх асуулт орж ирсэн нь шүүмжлэл дагуулсаар байна. Цаг хугацааны хувьд Ерөнхий сайд асан Л.Оюун-Эрдэнийн уналт, эцэг нэгтэй "Херо" Баатарын хөрөнгө мөнгөний эх үүсвэр олн анхааралд өртөх мөчтэй давхацсаных ч байж болох. Харин энэ тухайд Боловсролын сайд П.Наранбаяр өөрийн цахим хуудсаараа дамжуулж тайлбар хийв. 

Тэрбээр, "Элсэлтийн шалгалтад “Тамгагүй төр” жүжиг орж ирлээ гэсэн шүүмжлэл сүүлийн хэд хоног өрнөв.

Зохиогч Бавуугийн Лхагвасүрэн уг эмгэнэлт жүжгээ 1998 онд туурвисан бөгөөд үүгээрээ Ардын уран зохиолч хэмээх эрхэм хүндтэй цолыг хүртжээ. Харин 12-р ангийн сурах бичигт энэ жүжгийн зохиолын хэсэглэл орсон нь 2012 он. Уг жүжгээс ЭШ-д асуулт орж ирсэн нь 2023, 2024, 2025 онууд. Монголын жүжгийн зохиолоос Д.Нацагдоржийн“Учиртай гурван толгой” зэрэг цөөн зохиол сурах бичигт орсны нэг нь л “Тамгагүй төр” жүжгийн зохиол байсан хэрэг. Херо Баатар бол уг жүжгийн зохиолыг 2022 онд театрын тайзнаа найруулан тавьсан найруулагч. Ч.Найдандорж найруулагчийн 1998 онд найруулан тавьснаас хойш тасралтгүй тоглогдож ирсэн энэ жүжгийг Херо Баатар шинэчилсэн хэрэг юм. Сурах бичигт жүжиг орсон, ЭШ-д асуулт орсон нь Херотой ямар ч холбоогүй. Ийм л учиртай. Ийм юмаар улстөржих хэрэггүй" гэлээ.