Улсын их хурлын зарим гишүүн Боловсролын сайд П.Наранбаярыг огцруулах асуудлаар мэдээлэл хийлээ. Тодруулбал  УИХ-ын гишүүн Б.Бат-Эрдэнэ, П.Сайнзориг, Н.Батсүмбэрэл, Д.Бум-очир нарын гишүүд Боловсролын сайдыг огцруулах шаардлагатай хэмээлээ. 

Эндээс онцолбол, УИХ-ын гишүүн Б.Бат-Эрдэнэ "Шинэ засгийн газрыг дэмжиж байгаа, тогтвортой ажиллаасай ч гэж хүсэж байна. Харин Боловсролын сайд П.Наранбаярыг огцруулахыг шаардсан албан шаардлагыг нэр бүхий УИХ-ын гишүүд хүргүүлж байна. Тодорхой төсөвт хөрөнгийг улсын төсвөөр санхүүжүүлэх замаар тусгахыг завдсан. Тэр нь 1,2 тэрбум төгрөг юм. Тухайн үед гишүүд боломжгүй гэхэд сургуулийн менежментийн сайжруулах нэрээр сургууль бүрд 10 сая төгрөгийг олгох замаар, нөгөө мөнгөө тараан байршуулсан байгаа юм. Түүнийхээ дараа тэдгээр 120 сургуулиас буцаагаад нэг байгууллага руу буюу сургуулийн судалгаа хөгжлийн төв ТББ руу төвлөрүүлсэн. Өөрөөр хэлбэл чуулганд ярьж байсан мөнгөө ийм замаар бүрдүүлсэн. Энэ бол ашиг сонирхлын, авлига, албан тушаалын зөрчилтэй нь харагдаж байна". 

УИХ-ын гишүүн П.Сайнзориг "Элсэлтийн ерөнхий шалгалттай холбоотой асуудал өнгөрсөн хэд хоног олны анхаарлыг татлаа. Энэ жил 42 мянган хүүхэд уг шалгалтыг өгсөн. Зарим хүүхдийн оноог өөрчилж, өсгөж өгсөн гэх баримт бий. Шалгалт дээр тааруухан оноо авсан хүүхдийн дүнг өсгөсөн байна. Мөн агуулгуудыг өөрчилж, хүүхдүүдийн ирээдүйг үгүй хийж болохгүй. Элсэлтийн шалгалтын зохион байгуулалт болоод ил тод байдлыг тодорхой болгох шаардлагатай байна" гэлээ.