Зургаадугаар сарын 2-нд “Дулааны цахилгаан станц-3” ТӨХК-д гал гарч нэг инженер нь амиа алдсан. Ослыг тодруулбал, станц тоног төхөөрөмжөө унтраах үед “ТЭЦ-3"-ын хамгийн сүүлд авсан шинэ турбин шатсан байдаг. 

20-иод жилийн туршлагатай инженер нас барсан  ТЭЦ-III-ын уг осолд эрүүгийн хэрэг үүсгэн шалгаж эхэлсэн. Түүнчлэн Ерөнхий сайд Г.Занданшатар ажлаа авангуутаа уг асуудалд анхаарал хандуулж, "Дулааны цахилгаан станц-3"-т тогтоосон онцгой дэглэмийн хугацаанд Монгол Улсын Засгийн газарт эрх олгох тухай хуульд заасан арга хэмжээг авч хэрэгжүүлэх, компанийн үндсэн үйл ажиллагаа, удирдлага, зохион байгуулалтыг шууд хариуцан гүйцэтгэж, компанийг бүрэн төлөөлөх  эрх бүхий Засгийн газрын онцгой бүрэн эрхт төлөөлөгч томилон ажиллуулах болсноо нийтэд мэдээлсэн. Улмаар ЭХЯ-ны ТНБД-аас чөлөөлөгдөх хүсэлтээ өгсөн Н.Тавинбэхийг ажлаас нь чөлөөлж, Ерөнхий сайдын өгсөн үүрэг чилэлийн дагуу онцгой дэглэм тогтоосон “ТЭЦ-3”-ыг хариуцсан ЗГ-ын БЭТ буюу бүрэн эрхт төлөөлөгчөөр томилсон билээ.

Ослын дараа хэн хариуцлага хүлээх вэ гэх асуудал сөхөгдөхөд, Эрчим хүчний яам, "Эрчист монгол" ХХК бие бие рүүгээ буруугаа чихэж эхэлсэн тул УИХ-аас ажлын хэсэг байгуулж, ослын шалгалт, нөхөн сэргээх асуудалд бүх түвшний удирдлага хариуцлага хүлээх механизмыг бий болгох ёстой гэж дүгнэсэн байдаг. Тэгвэл эхнээсээ хариуцлагаа хүлээж, "ДЦС-3” ТӨХК-ийн Гүйцэтгэх захирал Л.Эрхбаатар болон Ерөнхий инженер  Н.Чимэддорж нарыг ажлаас нь чөлөөлжээ.