Монгол улсын Ерөнхий сайд Г.Занданшатар өөрийн танхимыг бүрдүүлж байна. Г.Занданшатарын Засгийн газрын Тэргүүн шадар сайд бөгөөд Эдийн засаг, хөгжлийн сайдаар яригдаж буй ЗГХЭГ-ын даргын үүргийг гүйцэтгэгч Н.Учралаас байр суурийг нь тодрууллаа.

Тэрээр " Хамтарсан Засгийн газрын баталсан төлөвлөгөөний дагуу ажиллана. Өмнөх Засгийн газрын 14 мега төслийн хамгийн эхний төслийг хариуцаж, гал атгаж явсны хувьд цаашдаа мега төслүүдийг эрэмбэлэх, Л.Оюун-Эрдэнийн Засгийн газрын ололт амжилтыг илүү бататгах, төрийн ажлын залгамж чанарыг хадгалахад илүү анхаарна. Улс төрийн эрх чөлөө эдийн засгийн эрх чөлөөгөөр баталгааждаг гэсэн бодолтой байдаг. 

Аж үйлдвэрийн салбарт хэрэгжиж байгаа төслүүдийг үргэлжлүүлж, эдийн засгаа төрөлжүүлэхэд анхаарч ажиллана. 

Миний хувьд төрийн ажлын залгамж чанарыг барьж ажиллана. Эдийн засгийн яам их өгөгдөл дээр суурилсан, иргэддээ ойр байх ёстой. Төр хувийн хэвшилтэй өрсөлдөхгүй байх зарчмыг хатуу барина. Төрийн ажил тасралтгүй явах ёстой. Одоо сандал, ширээгээ зөөгөөд гүйгээд байх цаг хугацаа байхгүй.

Хамтарсан Засгийн газрын эхлүүлсэн 14 мега төслийг үргэлжлүүлнэ. Гэхдээ эрэмбэлсний дараа зарим хөрөнгө оруулалтыг царцаах, зогсоох ажил явна. 

Яамгүй үндэсний хороо хариуцсан сайд нарыг томилохгүйгээр яваад төсвийн тодотгол хийх эсвэл ирэх оны төсөв дээр агентлагуудыг нэгтгэх, үндэсний 59 хороог татан буулгах, Засгийн газрын тусгай сангуудын ажлын албыг татан буулгах зэрэг ажлуудыг төсөвт хамтатгаж хийнэ.

Тэгэхээр давхардсан чиг үүрэг гэж байхгүй болно. Нэг ажлыг хоёр, гурван хүн хариуцдаг байдлыг больж, нэг хүн тухайн ажлыг толгойгоороо хариуцдаг болно" гэв.