Завхан аймгийн засаг дарга Г.Өнөрбаярын өөрийн цахим хуудастаа нийтэлсэн "ГОЛ НЬ ХҮЛЭЭН ЗӨВШӨӨРӨГДӨХ" нийтлэлийг бүрэн эхээр нь нийтэллээ. 

"Орос Украйны дайн, Энэтхэг Пакистаны мөргөлдөөн, Иран Израйлын үл ойлголцол, Хятад Тайваны зөрчил, Трампын худалдааны хориг дэлхийн бүх улс орны эдийн засагт сүүдрээ унагаж байна. Эрх барьж буй МАН маань иймэрхүү гадаад орчноос хамааралтай эдийн засгийн хямралаас гадна улс төрийн хувьд парламентад 42 суудалтай АН гэсэн том сөрөг хүчинтэй болов. Өчигдрийн хамтрагчид өнөөдрийн сөрөг хүчин болов. Ийм үед ажлаа мэддэг, асуудлын шийдлийг олдог С.Амарсайхан, С.Бямбацогт, Б.Чойжилсүрэн, Б.Жавхлан, Л.Энх-Амгалан, Н.Учрал, Б.Батцэцэг, Б.Дэлгэрсайхан, Ж.Энхбаяр, Т.Мөнхсайхан нараа улируулж ажиллаасай. Өнөөдөр тэднийг элдвээр шүүмжилдэг ч, илүү ажиллах шинэ гишүүд ховор. Тэдэн шиг асуудлаа сөрөг хүчинд ч, ард иргэдэд ч тайлбарлаж ойлгуулах гишүүд цөөн.

Үүнтэй зэрэгцээд парламентад листээр орж ирсэн гишүүд сайд болохоор өргөх бичиг барьсан тухай сошиалаар шуугижээ. Үнэндээ парламентад листээр орж суусан гишүүд өнгөрсөн хугацаанд улс төр хийх нь байтугай улс төрөө ч ойлголгүй нэг жилийг өнгөрөөв. Зарим нь намын даргынхаа эсрэг ажилласнаа “улс төр” гэж эндүүрэв. Ерөнхий сайд асан Л.Оюун-Эрдэнийн хамгийн том алдаа бол “салбар бүрт хүлээн зөвшөөрөгдсөн, нэр цэвэр” гэдэг шалгуураар улс төрийн ямар ч мэдрэмжгүй нөхдүүдийг листээр парламентад оруулсан явдал. Тэднийг листэд орууллаа гээд МАН илүү санал аваагүй. Авдаг саналын хувиа л авсан. Сая Л.Оюун-Эрдэнэ даргын талаарх гүтгэлэг гаарахад листийнхэн ямар ч галын дэмжлэг үзүүлж чадаагүй. Зарим нь бүүр “дахиж л битгий дуугараасай” гэж бодтол нэрмээс болж, буруу зөрүү ярьж, асуудлыг томруулсан. Листээр ороод сайд болбол анхан шатны гишүүд амаа билүүдэж, намын эв нэгдэлд улам л ан цав үүсэхээр байна. Цаашид листээр орогсод биш ард түмний мандатыг авсан, ядаж л тойрогтоо хүлээн зөвшөөрөгдсөн гишүүд сайд болж хэвших нь зөв.

Тэгээд туршлагатай, тулхтай сайд нараа “гулсуурын сайд” гээд гөвж өгчээ. Тэд хэрэв хүсвэл шинэ гишүүдийг хэд давсан улс төр хийж чадна л даа. Тэгэхгүй тайван сууцгааж байгаа биз. Тийм л хүмүүсээ дэмжээсэй. Харин листийнхний оронд тойргоос олон мянган хүний дэмжлэг авсан залуусаас оруулж, туршлагатай сайд нартай хослуулах нь зөв шийдэл болно. ЛИСТНИЙХЭН МААНЬ ХОЙШООГОО СУУЦГАА ДАА":