Жил бүрийн зургадугаар сарын 12-нд болдог Оросын өдрийг тохиолдуулан ОХУ-аас Монгол Улсад суугаа ЭСЯ-нд хүндэтгэлийн хүлээн авалт /06.10/ зохион байгууллаа. 1990 оны эл өдөр ОХУ-ын Төрийн бүрэн эрхт байдлын тухай тунхаглалыг баталсан бөгөөд энэ өдрөөс ОХУ-ын орчин үеийн түүх эхэлсэн гэж тооцдог билээ. Оросын Элчин сайдын яаманд болсон хүлээн авалтад Монгол Улсын Их Хурлын дэд дарга Б.Пүрэвдорж болон бусад УИХ-ын гишүүд, тус улсын яам, газруудын төлөөлөгчид, улс төр, нийгмийн зүтгэлтнүүд, Оросын элэг нэгтнүүд, Дипломат корпусын төлөөлөгчид оролцов.

ОХУ-аас Монгол Улсад суугаа Онц бөгөөд Бүрэн Эрхт Элчин сайд А.Н.Евсиков арга хэмжээг нээн мэндчилгээ дэвшүүлж, Мянга гаруй жилийн турш манай эх орон Балтийн эргээс Номхон далайн тэнгисийн эрэг хүртэл, туйлын мөсөн эзэнгүй тал нутгаас Дон мөрний халуун бугчим тал хээр хүртэл дэлхийн дөрвөн зүгт найман зовхист хязгаараа тэлж энх тайван, амар амгалан, харилцан итгэлцэл, нийтлэг хувь заяа, зорилго зорилтуудаар нэгтгэн амьдарч буй олон үндэстэн угсаа, соёл уламжлал, шашин шүтлэг бүхий хосгүй өвөрмөц нэгдмэл ард түмнээр дэлхийд гоёдог болсон билээ. Түмэн олноороо аливаа хүндрэлийг даван туулах чадвартай манай ард түмний нэгдмэл, эвтэй байдал нь Цэргийн тусгай ажиллагааны үйл явцад тогтмол илэрдэг. Дэлхий хорвоо өөрчлөгдөж байгаа энэ үед мөнхийн сайн хөрш Монгол Улстай нөхөрлөсөн бат бөх найрамдал онцгой ач холбогдолтой болоод байна. Манай хоёр улс зуун гаруй жилийн хугацаанд энх тайвны үед ч их амжилтыг хамт бүтээж, дайны цагт ч дайсныг хамт эсэргүүцэж явсан түүхэн их замналыг мартах учиргүй гэлээ.

Улсын Их Хурлын дэд дарга Б.Пүрэвдорж "Энэхүү өдөр нь Орос улсын олон зуун жилийн түүх, оюун санаа, соёлын баялаг өв, оросын ард түмний эв нэгдэл, тусгаар тогтнолыг бэлэгдсэн нэн шинэ түүхийн чухал өдөр билээ. Манай хоёр орны ард түмэн өнө эртнээс хаяа нийлэн аж төрж, найрамдал нөхөрлөлийн барилдлагатай явж ирсэн бөгөөд бид орос анд нөхөдтэйгөө энх цагийн бүтээн байгуулалт төдийгүй, хүнд хэцүү цаг үеүдэд ч мөр зэрэгцэн алхаж баялаг их түүхийг хамтран бүтээснээ нандигнан дурсдаг. ОХУ-тай тогтоосон иж бүрэн стратегийн түншлэлийн харилцаагаа харилцан ашигтай, бодит хамтын ажиллагаагаар өргөжүүлэн хөгжүүлж олон салбарт төсөл хөтөлбөрүүдийг амжилттай хэрэгжүүлнэ гэдэгт итгэлтэй байна" гэлээ.