МАН-ын Бага хурлын гишүүдээс сэтгүүлчид шинэ Ерөнхий сайдын талаарх мэдээллийг тодруулж байна.

Бага хурлын гишүүн П.Анужин: Парламентад суудалтай намуудын итгэлийг хүлээж, эв нэгдлийг хангах Ерөнхий сайдыг сонгох зайлшгүй шаардлага үүссэн. Л.Оюун-Эрдэнэ энэ засгийн газрыг маш сайн авч явсан. Төрийн тогтвортой бодлого, эв нэгдэл гадаад орчинд чухал байдаг. Монгол Улсын хөгжлийг гадаад хөрөнгө оруулалтгүйгээр төсөөлөх ямар ч боломж байхгүй. Улсын хөгжлийг 30 жил  гацаасан том төслүүдийг хөдөлгөсөн нь түүний ажлын үр дүн юм.

Миний хувьд УЗ-ийн шийдвэртэй танилцаагүй,  нэр дэвшигчдийн мэдээлэл тодорхойгүй байна. Тэгэхээр ямар нэгэн санал хэлэх боломжгүй. 2020-2024 онд УИХ-ын гишүүнээр ажиллаж байсан хүний хувьд Үндсэн хуульд оруулсан өөрчлөлтийн дагуу намуудын улс төрийн оролцоог хангах үүднээс “Хамтарсан засгийн газар”-ыг дэмжиж байсан. Цаашдаа ч дэмжих болно.

Энэ удаад байгуулагдсан 126 гишүүнтэй УИХ-д ганц нам дангаараа засаглах боломж байхгүй. Та бүхэн ажиглаж байгаа байх УИХ дээр хэлэлцэгдэж байгаа хуулийн төслүүд 68-аас дээш гишүүн дэмжээгүй тохиолдолд энэ хууль УИХ-ын босгыг давж чадахгүй нөхцөл байдалд орсон. Тэгэхээр эв нэгдлийг хангахын тулд цаашдаа ч хамтарч засаглах хэрэгтэй.

Улс төрийн ууган хүчин МАН сошиалаар хэн нэгнийгээ муухай харагдуулах гэж захиалж бичүүлдэг энэ байдлаа болихгүй бол цаашлаад МАН байтугай Монгол Улс олигтой хүнгүй мэт харагдаж эхэлж байна.