Монгол Улсын Ерөнхий сайд Л.Оюун-Эрдэнийг огцрохыг шаардсан "Огцрох амархан" иргэдийн жагсаал өчигдөр буюу 2025 оны 6-р сарын 2-нд Төв талбайд 21 дэх өдрөө үргэлжилсэн байна. Энэхүү жагсаалтай зэрэгцэн "Ерөнхий сайд Л.Оюун-Эрдэнийг огцруулахгүй" хэмээн өлсгөлөн зарласан хэсэг иргэдийн дунд хар тамхины хэрэгт холбогдсон хүн байгаа нь олны анхаарлыг татаж байна.

Өлсгөлөн зарласан Л.Отгонбат нь Эрүүгийн хуулийн 20.7 дугаар зүйлийн дагуу мансууруулах эм, сэтгэцэд нөлөөт бодисыг хууль бусаар ашигласан гэмт хэрэгт холбогдож, хоёр шатны шүүхээр ял шийтгэгдсэн нэгэн юм. Анхан шатны шүүх түүнд 1 жилийн зорчих эрхийг хязгаарлах ял оноосон бол давж заалдах шатны шүүх энэ шийтгэлийг хэвээр үлдээжээ.

Эрүүгийн хуулийн 20.7 дугаар зүйлд "Хориглосон мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгогүйгээр хууль бусаар бэлтгэсэн, хадгалсан, бусдад өгсөн, олж авсан бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ" гэж заасан байдаг.

Ташрамд дурдахад, Л.Отгонбат нь "Нэхүүл" холбооны удирдах зөвлөлийн дарга бөгөөд "Ерөнхий сайд Л.Оюун-Эрдэнийг огцруулахгүй" хэмээн өлсгөлөн зарласнаа зогсоож, эрүүл мэндийн тусламж үйлчилгээ авч байгаа гэдгийг хамт жагсаж байгаа иргэд нь мэдээлж байна.