Ерөнхий сайдад итгэл хүлээлгэх эсэх асуудлыг өчигдөр Засгийн газрын хурлаар шийдээд УИХ руу оруулахаар болж байх шиг байна. Энэ асуудал холбогдох хуулийн дагуу байнгын хороод руу орж намын бүлгүүдээр дамжиж орж ирэх ёстой. ХҮН нам бол зөвлөлөөрөө дамжин орж ирж хэлэлцээд тэндээс нэгдсэн байр суурь санал гаргана.

Ер нь бол Хамтарсан Засгийн газрыг огцруулах гэдэг асуудал сүүлийн хэдэн долоо хоног явж ирлээ. Өнгөрсөн хугацаанд Монгол Улсын Засгийн газар 1,8 жилийн дундаж  насжилттай явж ирсэн. Төр засгийн бодлого тогтворгүй, гадаад хөрөнгө оруулалт орж ирдэггүй эргэлзээтэй явж ирсэн. Засгийн газар тогтворгүй байх үед ард түмэн л лав хождоггүй. Улс орон дандаа хохирдог. Том төслүүд явдаггүй. Ийм  үед гадаад дотоодын том ашиг сонирхолтой хүмүүс хүслээ биелүүлж урагшилж  байдаг. Би хувь гишүүнийхээ хувьд улс төр тогтвортой байх ёстой гэж үзэж байна.

ХҮН нам  2024 онд Хамтарсан Засгийн газарт орохдоо 30 гаруй жилийн хугацаанд Монгол Улсын хөгжлийг гацаасан том төслүүд яваасай хэмээн бодож ачаа үүрэх гэж засгийн газарт орж ажилласан.

Ерөнхий сайд хүүтэйгээ холбоотой асуудал дээр тусдаа орлогоо нотолж тайлагнаад шалгуулах ёстой газраа шалгуулаад явна биз. Ерөнхий сайдад итгэл хүлээлгэх асуудлаа ХҮН нам зөвлөлдөж шийдээгүй байна. Энэ засгийн газар байгуулагдаад 10 сар болж байна. Эрчим хүчний хараат бус байдлаасаа гарья гээд реформ хийгээд эхний ажлууд амжилттай явж байна. Хил холболт, төмөр зам, байгалийн баялгаа экспортолъё гээд ажиллаад явж байна. Үндэсний баялгийн сантай холбоотой асуудлууд байна. Байгалийн баялгаасаа ард түмэн хүртдэг байя гэсэн тогтолцоог бий болгох гээд явж байна. Энэ ажлуудыг гацааж зогсооё гээд төр засгийг тогтворгүй болгоно гэдэг бол буруу.

Том төсөл хөтөлбөрүүд явах үед хувь улс төрчтэй холбоотой асуудлуудыг гаргаж тавьдаг юм байдаг. Үүнийг бид нар анхаарч байх хэрэгтэй. Дан ганц Л.Оюун-Эрдэнэ бус сүүлийн 30-аад жилд төрийн өндөр албан тушаал хашсан, эрх мэдэлтэй хүмүүсийн хөрөнгийг шалгах хуулийг гаргаж хяналт тавиад явах ёстой.