Найз охиндоо үнэт эдлэл, үнэтэй машин, цүнх авч өгч, нисдэг тэргээр зугаалсан гэх Ерөнхий сайдын хүү О.Тэмүүлэнгийн асуудал нийгмийн хүчтэй шүүмжлэлтэй тулгарч, томорсоор улс төрийн хүрээний ч мөн гол сэдэв болж хувираад буй.

Эл асуудал өнөөдөр /2025.05.27/ АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгт хэвлэлд "2025 оны 05 дугаар сарын 13-ны өдөр Ерөнхий сайд Л.Оюун-Эрдэнэ болон түүний хүү О.Тэмүүлэн болон бусад этгээдэд холбогдох гомдлыг нэр бүхий иргэдээс гаргасны дагуу шалгаж байна. Хяналт шалгалтын ажлыг хийж эхэлж, холбогдох этгээдүүдээс тайлбар авах, холбогдох баримтуудыг гаргуулан авах ажиллагаа үргэлжилж байнаЕрөнхий сайд Л.Оюун-Эрдэнийн хөрөнгө, орлогын мэдүүлэгт хяналт, шалгалт хийж эхэлсэн. Авлигын эсрэг хуулийн 13.4-р зүйлд заасны дагуу Засгийн газрын тэргүүн болон гишүүний хувиар Хөрөнгө орлогын мэдүүлэгт хяналт шалгалт хийж эхэлсэн" гэсэн тайлбар өгсөн. 

Тэгвэл Монгол Улсын Ерөнхий сайд Л.Оюун-Эрдэнийн хөрөнгө орлогын мэдүүлгийг танилцуулж байна. Түүний хамгийн сүүлд буюу 2023 онд мэдүүлсэн ХОМ-т өөрийн орлого 243 сая төгрөг гэсэн бол гэр бүлийн гишүүдийн орлого 15 сая төгрөг гэжээ.

364 сая төгрөгөөр үнэлэгдэх нэг орон сууцтай, өр зээл авлагагүй. "Херо энтертайнмент групп” ХХК-ийг 100 хувь эзэмшдэг байна.