ХЗДХ-ийн сайд О.Алтангэрэл өнөөдрийн Засгийн газрын хуралдаанаар хэлэлцсэн "Нийтийн албан тушаалтны хууль бус хөрөнгийг иргэний журмаар хурааж авах, нөхөн төлүүлэх тухай хуулийн төсөл"-ийн талаар мэдээлэл өглөө.

Онцолбол, "Засгийн газрын нэгдүгээр сарын 22-ны өдрийн хуралдаанаар Нийтийн албан тушаалтны хууль бус хөрөнгийг нөхөн төлүүлэх тухай хуулийн төслийг өргөн мэдүүлэхийг дэмжсэн юм. Ингээд нэгдүгээр сарын 24-нд УИХ-ын даргад өргөн барьсан. Энэ нь ганцхан хөрөнгө хураах тухай биш, авлигын эсрэг багц хуулийн төсөл байгаа юм. Авлигын эсрэг хууль, Цагдаагийн албаны тухай, Эрүүгийн хэрэг хянан шийдвэрлэх тухай гээд олон хуульд өөрчлөлт оруулах хуулийн төсөл бөгөөд хэлэлцэх товд оруулахгүйгээр олон сарын нүүрийг үзсэн. Өнгөрсөн Даваа гарагт Засгийн газар эл хуулийн төслөө УИХ-аас татаж аваад зохих өөрчлөлтүүдийг хийгээд, өнөөдрийн Засгийн газрын хуралдаанаар хэлэлцээд, УИХ-д өргөн мэдүүлэхээр тогтож байна. Энэ хуулийн төслийг "Нийтийн албан тушаалтны хууль бус хөрөнгийг иргэний журмаар хурааж авах, нөхөн төлүүлэх тухай" гэж өөрчиллөө. Мөн энэ хуулийн үйлчлэлд хамаарах, нэн түрүүнд шалгах ёстой субъектийг нь төрийн өндөр албан тушаалтнаас эхлэх байдлаар өөрчиллөө. Хуулийг 2002 оноос хойших хугацаанд хамааруулж үйлчлэхээр тусгаж байгаа. 2002 оноос эрүүгийн хэрэгт яллагдагчаар татагдаж шалгагдаж байгаад өршөөгдсөн хүмүүс байна. Шүүхээр ороод авлигын хэргээр ял авчихсан хэрнээ хөрөнгөө хураалгаагүй хүмүүс байна. Мөн ямар нэгэн байдлаар эрүүгийн хэрэгт шалгагдаж, ял сонсоогүй боловч хөрөнгөө тайлбарлаж чадахгүй хүмүүс байна. Эдгээр хүмүүсийн хөрөнгийг иргэний шүүхийн журмаар хураая гэсэн өөрчлөлт оруулж байна. Ял шийтгэл оноохгүй, хөрөнгийг нь хураана гэсэн үг. Хөөн хэлэлцэх хугацаа нь нэгэнт дуусчихсан асуудалд хуулийн ял шийтгэл ярих боломжгүй болчихоод байгаа юм. Хөрөнгө завшиж, хууль бусаар хөрөнгөжсөн хүмүүс олон жил санаа сэтгэл амар явж ирлээ. Энийг өөрчилнө" гэв.